Múgedektigi bar adamdardyń kóbi daýys berýge bardy – Qazaqstannyń Eńbek Eri
Aqtóbe oblysyndaǵy referendým ýchaskelerinde daýys berý jalǵasyp jatyr. Qala men aýdan, aýyldarda tańdaý jasaıtyn adamdar úshin qolaıly jaǵdaı jasalǵan. Qazaqstannyń Eńbek Eri úıde otyryp emes, referendým ýchaskesine barýdy jón kórdi. Munda jyldymaly pandýs múdirmeı jumys istep tur.
- Qazaqstanda Referendým ótetinin halyq kópten biledi. Osy taqyryp talaı talqyǵa tústi. Bul – saıası mańyzdy taqyryp. Ózim sheshim qabyldar shaqta qalys qalmaý kerek dep oıladym. Buǵan deıin de barlyq daýys berý naýqanyna qatystym, osy joly da tańdaý jasadym. Elimizdegi kez kelgen jaǵdaıǵa biz de, osy eldiń halqy jaýap beredi. Sondyqtan osy mańyzdy sheshim qabyldar tusta shet qalmaımyn. Tańdaý jasadym. Búgin múgedektigi bar adamdardyń kóbi daýys berýge bardy. Olar úshin 30-dan astam ınvataksı qyzmet kórsetedi. Keıbiri úıden daýys berýge ótinish jazdy. Ózim Raýan turǵyn alabynda turamyn. Referendým ýchaskesine kirýde esh qıyndyq kórmedim. Esik aldynda jyljymaly pandýs jumys istep tur. Tabaldyryqta kedergi joq. Kózi nashar kóretinder úshin bar jaǵdaı jasalǵan, - dedi Qazaqstannyń Eńbek Eri Quralaı Baımenova.
Aıta keteıik, búgin tańerteń mádenıet salasynyń qaıratkerleri erli-zaıypty Baqytjanovtar daýys berdi.
Tańda turyp, erte tańdaý jasaǵandarǵa syılyq berildi.