Múgedekterdi jumyspen qamtý kvotasyn oryndamaǵan kompanııalar memlekettik satyp alýǵa qatyspaıdy

NUR-SULTAN. QazAqparat - Múgedekterdi jumyspen qamtý kvotasyn oryndamaǵan kompanııalarǵa memlekettik satyp alýlarǵa qatysýǵa shekteý engiziledi. Bul týraly QR Eńbek jáne halyqty áleýmettik qorǵaý mınıstrliginiń keńeıtilgen alqa otyrysynda vedomstvo basshysy Birjan Nurymbetov aıtty, dep habarlaıdy QazAqparat tilshisi.

Mınıstrdiń dereginshe, Qazaqstanda shamamen 695 myń múgedektigi bar adam turady. 2019 jyly múgedekterdi áleýmettik qorǵaýǵa respýblıkalyq bıýdjetten 323 mlrd teńge bólindi. 2019 jyldyń 1 shildesinen bastap múgedek balanyń jáne 18 jastan asqan bala kezinen birinshi toptaǵy múgedektiń kútimi boıynsha memlekettik járdemaqylardyń mólsheri 30 paıyzǵa ósti. 292 myńnan astam múgedek nemese barlyq muqtaj adamdardyń 70 paıyzy ońaltýdyń qajetti quraldary men qyzmetterimen qamtamasyz etilgen. Sonymen qatar, ol múgedekterdiń quqyqtaryn qamtamasyz etý jáne ómir súrý sapasyn jaqsartý jónindegi 2025 jylǵa deıingi ulttyq jospar aıasynda jumystar júzege asyrylatynyn aıtty.

«Ony júzege asyrý aıasynda Áleýmettik qyzmetter portaly kezeń-kezeńimen engizilip jatyr. Onyń kómegimen azamattar memlekettik satyp alýsyz ońaltýdyń qajetti quraldary men qyzmetterin óz betinshe tańdaı alady. Osy jyldan bastap portal arqyly jeke tańdaýdy qajet etpeıtin tehnıkalyq ońaltý quralynyń 24 túrin satyp alady. 2021 jyldan bastap tehnıkalyq ońaltý quralynyń barlyq 55 túri qoljetimdi bolady. 2020 jyldyń shildesinen bastap jeke kómekshilerdiń, ymdaý tili mamandarynyń qyzmetteri men sanatorlyq-kýrorttyq emdeý qoljetimdi bolady. Sonymen qatar, bıyl alǵash ret elektr jetegi bar qazaqstandyq múgedekter arbalaryn shyǵarý qolǵa alynady. Ekinshi toqsannan bastap biz alǵashqy múgedekter arbasyn bere bastaımyz», – dedi ol.

Onyń aıtýynsha, aldaǵy eki jyldyń ishindegi Eńbek mınıstrliginiń basty mindeti – múgedekterdiń ekonomıkalyq belsendiligi úshin múmkindikter jasaý.

«Biz múgedektigi bar adamdardy organızm fýnktsııalarynyń buzylý túrlerine baılanysty jumysqa ornalastyrý jónindegi usynymdarmen kásipter atlasyn ázirleýdi josparlap otyrmyz. Shet elderdiń tájirıbesine súıene otyryp, bıyl biz memlekettik satyp alý týraly zańnamaǵa ózgerister engizý týraly bastama kóterýdemiz. Múgedektigi bar adamdardy jumyspen qamtý kvotasyn oryndamaıtyn iri jáne orta kompanııalar úshin memlekettik satyp alýlarǵa qatysýdy shekteıtin norma engizý usynylady. Sondaı-aq, Japonııa men Germanııa tájirıbesine súıene otyryp, biz jumyspen qamtý kvotasynyń ornyna arnaıy qorǵa ótemaqy tóleýdi engizýdiń balama tetigin qarastyryp jatyrmyz. «Eńbek» memlekettik baǵdarlamasy aıasynda mıkrokredıt jáne qaıtarymsyz grant berý quraldary múgedektigi bar adamdardyń bıznes bastamalaryna baǵyttalady», – dedi Birjan Nurymbetov.