Múgedek jandar qoǵamdyq orynda qandaı kedergilerge jıi tap bolady

<p>ASTANA. KAZINFORM &ndash; Elimizde 730 myńnan astam múgedek jan bar, bul jalpy halyq sanynyń 3,6% quraıdy. Bul týraly Eńbek jáne halyqty áleýmettik qorǵaý mınıstrligi áleýmettik qorǵaý salasyndaǵy retteý jáne baqylaý komıtetiniń tóraǵasy Tólegen Ospanqulov málim etti.</p>

- Bıyl 11 aıda áleýmettik ınspektorlar 2 474 tekserý júrgizdi. Olar múgedek jandar úshin qoljetimdilik pen kórsetilgen arnaýly áleýmettik qyzmet deńgeıin baqylady. Atap aıtqanda 629 tekseris profılaktıkalyq baqylaý aıasynda, 655 jospardan tys jáne prokýratýranyń talaby boıynsha 1190 tekseris júrgizildi, - dedi Tólegen Ospanqulov Ortalyq kommýnıkatsııalar qyzmeti alańynda ótken baspasóz máslıhatynda.

Komıtet tóraǵasynyń aıtýynsha, tekserý nátıjeleri boıynsha erekshe jandarǵa qyzmet usynýshylarǵa 949 uıǵarym berildi.

- Áleýmettik ınspektorlar 215 mln teńgeden astam somaǵa 961 aıyppul saldy. Tekserý barysynda barlyǵy 174 ákimdik, 167 arnaýly áleýmettik qyzmet kórsetý ortalyǵy, 88 emhana men aýrýhana, 11 ońaltý ortalyǵy, 468 balabaqsha, 802 mektep, 144 lıtseı men kolledj, 110 jergilikti atqarýshy organdardyń bólimderi men basqarmalary, 39 saýda úıi jáne 2 bank qamtyldy, - deıdi ol.

Sondaı-aq mınıstrlik ókili múgedek jandar jıi tap bolatyn problemalardy atady.

- Pandýstyń bolmaýy, pandýstyń kólbeý buryshynyń, sondaı-aq esik eniniń normatıvterge sáıkes kelmeýi, ǵımaratqa kireberiste tutqalardyń bolmaýy, sanıtarııalyq-turmystyq oryndardyń múgedek jandar úshin beıim emestigi. Sonymen qatar arnaıy turaq oryndarynyń, kórsetkishterdiń, kórý qabileti buzylǵan jandar úshin baǵyttaýshy belgilerdiń joqtyǵy, - dep túsindirdi T. Ospanqulov.

Aıta keteıik, qarashada Úkimet basshysy múgedek jandardy eńbekpen qamtý boıynsha mınıstr men ákimderge mindetter júktedi.