Múgedek balalarǵa áleýmettik járdemaqy kólemi artýy múmkin – zań jobasy
«Azamattardyń jekelelegen sanattaryn áleýmettik turǵyda qoldaýǵa baǵyttalǵan zańǵa ózgerister men tolyqtyrýlar engizý týraly zań jobasy ázirlendi. Qujat Parlament Májilisine taıaýda engiziledi. Atalǵan jobaǵa sáıkes, 7-16 jas aralyǵyndaǵy múgedek balalardy halyqaralyq kvalıfıkatsııaǵa sáıkes, ómir súrýine qıyn keltiretin shekteýlerge baılanysty dárejege bólý qarastyrylǵan. Bul usynysty zańǵa engizý bastamasyn QR Bala quqyqtary jónindegi ýákil Arýjan Saın kótergen bolatyn. Sonymen qatar, belgilengen úsh sanattyń bárine beriletin járdemaqynyń kólemin arttyrýdy kózdep otyrmyz», - dedi Erlan Áýkenov «Balalyq shaqty qorǵaý júıesiniń tıimdiligi jáne balanyń ál-aýqaty: memleket pen azamattyq qoǵamnyń birigýi» taqyrybyndaǵy baspasóz máslıhatynda.
QR Eńbek jáne halyqty áleýmettik qorǵaý vıtse-mınıstri bul turǵyda naqty qandaı ózgerister engizilgeli jatqanyn aıtyp ótti.
«Suraq mynadan týyndaıdy: máselen eki bólek otbasynyń 8 jastaǵy múmkindigi shekteýli eki balasy bar delik. Olardyń bireýi mektepke baryp, bilim alý jaǵdaıynda, ıaǵnı onyń múgedektik dárejesi jeńil bolýy yqtımal. Al ekinshi bala balalardyń sal aýrýymen aýyrýy múmkin. Sondyqtan olardy toptar boıynsha bólýdi josparlap otyrmyz», - dedi ol.
Eske sala ketsek, atalmysh baspasóz máslıhatynda QR Bala quqyqtary jónindegi ýákil Arýjan Saın balalardyń shyǵarmashylyq jáne sporttyq úıirmeleriniń tegin bolýyn shektep turǵan kedergilerdi ataǵan edi. Onyń aıtýynsha balalarǵa tegin úıirme uıymdastyrýǵa ákimdikter yńǵaı tanyta qoımaǵan, ıaǵnı bıýdjetten bul maqsatta qarajat bólgisi kelmeı otyr.