Múgedek áıeldi órtten qutqarǵan polıtseı: Adam ómirine qaýip tóngende oılanýǵa ýaqyt bolmaıdy

ÓSKEMEN. QazAqparat – Óskemen qalasynda jalyn sharpyǵan jer úıden múmkindigi shekteýli eki adam shyǵa almaı qalǵan. Sol kezde oqıǵa ornyna órt sóndirýshilerden buryn jetken polıtsııa qyzmetkerleri Qanat Qasymhanov pen Mırhat Gınaıatov esh kidirmesten olardy qutqarýǵa umtyldy, dep habarlaıdy QazAqparat tilshisi.

Oqıǵa 7 jeltoqsan kúni saǵat 07.40-shamasynda boldy. «102» jedel arnasyna Kamchatskaıa kóshesindegi jeke turǵyn úıdiń órtenip jatqany jaıly habar túsken. Sol jerge lezde qalalyq Polıtsııa basqarmasy patrýldik polıtsııa batalonynyń qyzmetkerleri Qanat Qasymhanov pen Mırhat Gınaıatov kelip jetedi.

«Úıdiń aldynda bir top adam jınalyp qalypty. «Bul úıde kim turady?» dep suradyq. Sol kezde olar munda múgedek eki kisiniń turatyndyǵy jaıly aıtty. Qaqpanyń esigi jabyq bolǵandyqtan áriptesim ekeýimiz sekirip ishke endik. Osy mezette úı ishinen aıqaılaǵan daýystar estildi», - deıdi aǵa leıtenant Qanat Qasymhanov.

Tártip saqshylary órt sóndirýshilerdiń kelip jetkenin kútip turmaı terezeni shaǵyp úıge kirgen.

«Adam ómirine qaýip tóngende oılanýǵa ýaqyt joq. Syn saǵatta dereý áreket etpesek kesh qalýymyz múmkin. Áıteýir degende bir bólmeden áıel adamdy taptyq. Artynan anyqtalǵandaı, oǵan ıis tıgen eken», - deıdi polıtseı.

Polıtsııa qyzmetkerleri ony kóterip tereze arqyly syrtqa shyǵarǵan. Sol kezde áıel úıde arbaǵa tańylǵan apaıynyń qalyp qoıǵanyn jetkizdi. Saqshylar qaıtadan ishke kirip izdeýge kiristi. Biraq úıdi tumshalaǵan qoıý tútin men laýlaǵan ot bet qaratpady. Mine osy ýaqytta órt sóndirýshiler kelip jetken. Qutqarýshylar kóp uzamaı ekinshi áıeldi taýyp aldy. Olarǵa oqıǵa ornynda jedel járdem qyzmetkerleri alǵashqy medıtsınalyq kómek kórsetken. Osylaısha, múmkindigi shekteýli eki áıel de aman qaldy.

Kúrshim aýdanynda dúnıege kelgen Qanat Qasymhanovtyń quqyq qorǵaý organynda qyzmet etip júrgenine 14 jyldan asypty. Úılengen, eki balasy bar. Al Óskemen qalasynda 1996 jyly týǵan Mırhat Gınaıatov ázirshe boıdaq. Saqshylardyń sózinshe, oqıǵa qas-qaǵym sátte óte shyqqan. Búginde olardyń erlikteri baǵalanyp, ShQO Polıtsııa departamentiniń bastyǵy Saǵat Mádıevtiń qolynan gramota aldy.