Muǵalimdikten mınıstrlikke deıin: Erbol Myrzabosynov kim
Resmı ómirbaıanyna qarasaq, ol 1984 jyly Shyǵys Qazaqstan oblysynda dúnıege kelgen. Eki birdeı mamandyq boıynsha joǵary bilim alǵan. Onyń biri – pedagogıka, ekinshisi – zańgerlik. Áýeli Semeı memlekettik pedagogıkalyq ınstıtýtyn, odan keıin Qazaq gýmanıtarlyq-zań ınnovatsııalyq ýnıversıtetin támamdaǵan. Sondaı-aq, Qazaq sport jáne týrızm akademııasynyń túlegi atanǵany bar.
Eńbek jolyn 2005 jyly Semeı memlekettik pedagogıka ınstıtýty dene shynyqtyrý jáne sport teorııasy men ádistemesi kafedrasynyń assıstenti, jattyqtyrýshy-oqytýshy retinde bastaǵan. Osy Semeı memlekettik pedagogıkalyq ınstıtýtynda júrip, dene tárbıesi kafedrasynyń meńgerýshisine deıin kóteriledi.
Al 2006 jyldan bastap 12 jyl boıy ShQO buqaralyq sporttaǵy joǵary sport sheberligi mektebinde jattyqtyrýshy-oqytýshy bolyp jumys istegen.
Onyń qyzmetindegi iri betburys 2018-2020 jyldarǵa dóp keledi deýge bolady. Bul kezeńde ol «Qyzyljar arlandary» sport klýbynyń dırektory bolyp eńbek etti. Osy qyzmetinde kózge túsip, keıin (2020-2021 jyldary «Qazaq kuresi» qaýymdastyǵynyń basqarýshy dırektory laýazymyn atqardy. Al 2021 jyly Dene shynyqtyrý jáne buqaralyq sport akademııasynyń rektory bolyp taǵaıyndalyp, 2023 jylǵy aqpanda Sport jáne dene shynyqtyrý isteri komıtetiniń tóraǵasy bolǵansha osy qyzmette eńbek etti.
Erbol Myrzabosynovtyń mınıstrlik tizginin ustaýyn Eldos Smetov pen Ǵusman Qyrǵyzbaevtyń Parıj Olımpıadasynda altyn jáne qola medal alýymen, Demeý Jadyraevtyń grek-rım kúresinen kópten kútken «kúmisti» enshileýimen baılanystyryp jatqandar bar. Rasymen de kúres túrleri Parıj tórinde jurt kútken mejeden artyq nátıje kórsetti deýge bolady.
Belgili sport jýrnalısi Aslan Qajenov te mundaı boljamdardyń atylýyna negiz bar dep esepteıdi.
«Biz buǵan deıin sport salasyndaǵy kem-ketikterdi sporttan habary joq adamdardyń basshylyq etýimen baılanystyryp keldik. Keıingi tórt jylda 4 mınıstr aýysqanyn aıtyp júrmiz ǵoı. Onyń árqaısysy salanyń damýyna ózinshe úles qosyp, bastamalar kóterdi. Biraq osy salanyń adamy bolmaǵannan keıin bir jyldaı ýaqyttary jumysty zertteýge, tanýǵa ketedi. Sonyń saldarynan kóp bastamalar aıaqsyz qalyp jatty, sabaqtastyq bolǵan joq. Al Erbol Myrzabosynov sport salasynyń ókili. Ózi de kúresten bastaǵan. Tómennen bastady deýge bolatyn shyǵar. Sportshydan bastap, pedagog, bapker boldy. Keıingi jyldary sport jáne dene shynyqtyrý komıtetiniń tóraǵasy bolǵan kezinde menedjerlik qabiletimen kózge tústi. Parıj Olımpıadasyndaǵy jetistikter, ásirese Eldos Smetovtiń tarıhı jeńisine óziniń qosqan úlesi bar. Sport medıtsınasy men ǵylymdy damytý, bapkerlerdiń eńbekaqysyn kóterý, ınfraqurylymdy jetildirý sııaqty salanyń ákki mamandary ǵana kóre alatyn bastamalar kóterip júrdi. Endi sol ıdeıalaryn iske asyrýǵa jaqsy múmkindik týdy dep oılaımyn. Mınıstr bolyp kim kelse de, tórt jyl ýaqyt berse degendi únemi aıtyp júrmiz. Qazaq sportyna reformalardy aıaǵyna deıin iske asyratyn, soǵan basymen jaýap beretin basshy kerek. Áleýmettik jelide osy taǵaıyndaý týraly aqparatty bólisip edim, sala mamandary qoldap jatyr. Bul da bolsa, osyǵan deıin atqarǵan jumysynyń nátıjesi bolsa kerek», - deıdi sarapshy.
Jýrnalıst Erbol Myrzabosynov Sport jáne dene shynyqtyrý komıtetiniń tóraǵasy bolyp turǵanda balýandar men boksshylardyń oqý-jattyǵý jıyndaryn saýatty uıymdastyra alǵanyn aıtady.
«Endigi jumysynda kenje qalyp turǵan ulttyq sport túrlerine kóbirek kóńil bólse eken. Basqada ózekti máselelerdi ishinen biledi. Árıne, onyń bárine kedergiler kóp bolady. Biraq sheginerge jol joq kezeńge tap kelip turmyz.
Búgin Prezıdent Joldaýynda aıtylǵan sport týraly zań jobasyn ázirlep jatqan jumys tobynda men de barmyn. Zańnamalyq ózgeristerdiń ishinde memleketten qarjylandyrylatyn 184 sport túrin qysqartý, legıonerlerge bıýdjetten aqsha tólemeý, federatsııalardy eseptilikke mindetteý sııaqty ondaǵan talap bar. Jańa mınıstrdiń aldynan osy ózgeristerdi qorǵaý, qabyldaý kezinde kedergiler shyǵýy múmkin. Óıtkeni bıýdjetti ábden maıshelpekke aınaldyrǵan adamdardyń kóbine bul jaqpaýy múmkin. Túrli múddeler men qıturqy shemalar bar. Sonyń bárimen tabandy kúres júrgizbese, jumysynan nátıje bolmaı qalýy da yqtımal», - deıdi Aslan Qajenov.
Aıta ketsek, búgin Memleket basshysy Qasym-Jomart Toqaev «Ádiletti Qazaqstan: zań men tártip, ekonomıkalyq ósim, qoǵamdyq optımızm» atty Joldaýynda sport salasyndaǵy zańnamany jańartýdy tapsyrdy.
Buǵan deıin habarlanǵanyndaı, Memleket basshysynyń Jarlyǵymen Erbol Qýantaıuly Myrzabosynov Qazaqstan Respýblıkasynyń Týrızm jáne sport mınıstri laýazymyna taǵaıyndaldy.