Muǵalimderdiń eńbek demalysy qalaı esepteledi

<p>ASTANA. KAZINFORM &ndash; Qoǵamda &laquo;muǵalimderdiń eńbek demalysy kóp, sáıkesinshe kóp aqsha alady&raquo; dep pedagogterdiń jalaqysyn eseptep júretinder az emes. Muǵalimderdiń eńbek demalysy týraly Oqý-aǵartý mınıstrligi resmı aqparat usyndy.</p>

Pedagogter úshin eń mańyzdy áleýmettik kepildikterdiń biri - jyl saıynǵy aqyly eńbek demalysyna shyǵý ýaqytynyń uzaqtyǵyn belgileý.

Onyń uzaqtyǵy barlyq pedagog úshin 56 kúntizbelik kúndi qurap otyr. Pedagogterge jyl saıynǵy aqyly eńbek demalysynyń 2 túri beriletinin atap ótken jón: negizgi jáne qosymsha. Qosymsha demalys ekologııalyq qolaısyz jáne radıatsııalyq qaýpi bar aýmaqtarda turatyn pedagogter úshin qarastyrylǵan. Onyń ishinde ekologııalyq qolaısyz aýmaqtarda turatyn pedagogter úshin qosymsha demalystyń uzaqtyǵy 7 kúnnen 12 kúnge deıingi, al radıatsııalyq qaýipti aýmaqtarda turatyn pedagogter úshin 5 kúnnen 14 kúnge deıingi merzimdi quraıdy. Demalys ýaqytyna túsken mereke kúnderi eńbek demalysyna kirmeıdi. Eńbek demalysyn berý kezinde naqty jumys istegen ýaqyt qana esepke alynady.

«Eńbek demalysyn berý kezinde saýyqtyrýǵa arnalǵan járdemaqy laýazymdyq jalaqy mólsherinde tólenedi. Saýyqtyrý járdemaqysynyń mólsherin esepteý pedagogtiń demalys berilgen kúngi naqty júktemesin eskere otyryp, laýazymdyq aqy mólsherinde júrgiziledi, munda qosymsha aqylar men ústemeaqylar eseptelmeıdi», - deıdi QR Oqý-aǵartý mınıstrligi Bıýdjettik josparlaý departamentiniń Eńbekaqy tóleý ádisnamasy basqarmasy basshysy Gúlaıym Toqpanova.

Pedagog qosymsha jumysty nemese ýaqytsha bolmaǵan qyzmetkerdiń mindetterin óziniń negizgi jumysynan bosatylmaı oryndaǵan jaǵdaıda bul laýazymdardy qatar atqarý bolyp tabylady. Mundaıda saýyqtyrýǵa arnalǵan járdemaqy pedagogke negizgi laýazymy boıynsha ǵana tólenedi. Eger pedagog qosymsha jumysty laýazymdardy qosa atqarý týraly jeke eńbek sharty boıynsha negizgi jumystan bos ýaqytynda atqarsa, saýyqtyrýǵa arnalǵan járdemaqy negizgi jumys úshin de, qosymsha jumys úshin de bólek tólenýge tıis.