Muǵalimniń jetistigi shákirtteriniń tabysynan kórinedi – úzdik pedagog
-Svetlana Mıdhatqyzy, bıyl «Úzdik pedagog» atanǵanǵa deıin qandaı joldan óttińiz?
-Men Kamen (qazir Tasqala) aýylynda ustazdar otbasynda dúnıege keldim. Sondyqtan bolar, muǵalimdik mamandyqty birden tańdadym. Ózim ómir boıy úlgi etetin ustazdarym da az bolǵan joq. Ásirese, Tatıana Andreevna Sappa, Evgenıı Iosıfovıch Emelın týraly shákirtterime únemi aıtyp otyramyn. Qazir ózim eńbek etetin mektepti bitirgennen keıin birden M.Gorkıı atyndaǵy Perm memlekettik ýnıversıtetine geografııa fakýltetine oqýǵa túsip kettim. 1993 jyly dıplom alyp, ózimniń altyn uıama geografııa pániniń muǵalimi bolyp oraldym.
Mine, pedagogıkalyq jumys ótilim de 27 jyldan asty. «Úzdik pedagog» atanýym da osy kezeńdegi eńbegimniń jemisi dep oılaımyn.
-Endeshe, tabystaryńyzdy aıta ketseńiz?
-Túrli is-sharalarda dańqty jerlesimiz, Keńes Odaǵynyń Batyry Sadyq Shákeluly Jaqsyǵulov atyndaǵy mekteptiń namysyn abyroımen qorǵaýǵa tyrysamyn. Mysaly, Berlınde (Germanııa) ótken jańashyl muǵalimderdiń 7-Eýropa forýmyna Qazaqstan atynan qatystym. Respýblıkalyq, oblystyq kásibı baıqaýlardyń birneshe ret jeńimpazy atandym. Mundaı konkýrstarǵa tek jas áriptesterimiz ǵana emes, tájirıbeli ustazdar da qatysýy kerek dep sanaımyn. Óıtkeni ondaı is-sharalar muǵalimniń shyǵarmashylyq qabiletin shyńdap, jyldar boıy jınaǵan tájirıbesin júıeleýge múmkindik beredi. Basqa pedagogtarmen óz jańalyqtarymyzben bólisý múmkindigin múlt jiberýge bolmaıdy dep esepteımin.
Sońǵy baıqaýǵa qatysty aıtarym, Qostanaı jurtshylyǵy elimizdiń úzdik pedagogtaryn tamasha qarsy aldy, sol úshin uıymdastyrýshylarǵa alǵysymdy bildirgim keledi.
-«Shákirtsiz ustaz tul», demekshi, óz qatarynan oza shaýyp júrgen oqýshylaryńyz da az emes shyǵar?
-Munyń syry óz pánimizdi barynsha jańashyldyqpen berýde dep bilemin. 2002 jyldan beri óz jumysymda jobalyq qyzmet tásilin qoldanyp kelemin. Sonyń nátıjesi bolar, shákirtterimniń jobalary halyqaralyq, respýblıkalyq konferentsııalar men baıqaýlarda joǵary baǵa alyp júr. Mysaly, 2019 jyly Arına Inshına Qaraǵandy qalasynda ótken respýblıkalyq ekologtar forýmynda ekinshi orynǵa ıe boldy. Odan buryn, 2012 jyly taǵy bir shákirtim Anel Qalıeva Máskeý qalasynda ótken áleýmettik mańyzy bar zertteý jumystarynyń halyqaralyq baıqaýyna Qazaqstan atynan qatysty. Sondaı-aq Sáýle Ishanǵalıeva men Dıana Muratova oqýshylardyń ǵylymı jarystarynyń oblystyq kezeńinde top jarsa, Kámıla Shátenova ál-Farabı halyqaralyq olımpıadasynda ozyp shyqty. Osylaısha olar geografııa páninen alǵan bilimderin joǵary deńgeıde kórsetip keledi. Aldaǵy ýaqytta da solaı bolaryna senemin.
Qoryta aıtqanda, muǵalimniń jetistigi shákirtteriniń tabystarynan kórinedi. Túptep kelgende, bizder, ustazdar, úzdik túlekter tárbıelesek, bolashaqta olar myqty maman bolyp, elimizdiń odan ári órkendeýine súbeli úles qosady.
Eske sala keteıik, budan buryn Ásel Ermentaevanyń ustazdyń abyroı-bedeli onyń ózine baılanysty ekenin, Dámetken Baenovanyń muǵalimge qurmet te, mártebe de qajyrly eńbekpen keletinin aıtqanyn jazǵan bolatynbyz.
Sondaı-aq Quralaı Isqaqova ustazǵa oqyp-úırený men izdenýdi ómir boıy toqtatpaýy kerektigin jetkizdi.
Tárbıeshi Úmit Eljanova baldyrǵandarmen jumys isteý úlken baqyt ekendigin atap ótti.