Muǵalimniń mártebesi týraly zań jarııa talqylansa ıgi - Molot Soltanaev

JARKENT. QazAqparat - Elbasy Nursultan Nazarbaevtyń jyl saıynǵy Joldaýynyń qaı-qaısysy da egemen elimizdiń eńsesin tikteý jolynda baǵaly baǵyt-baǵdar berýimen baýraıtyn. Bıylǵysy da sol ıgi qadamdy baıandy etip, jan-jaqty da tereń qamtylǵan qundy qaǵıdalarymen qatty qýantty. 

Bárinen buryn Prezıdenttiń pedagogtardyń bedelin bıiktetý baǵytyndaǵy oı-baılamdary aıryqsha tánti etti.

«Qazaqstandyqtardyń ál-aýqatynyń ósýi: tabys pen turmys sapasyn arttyrý» atty Joldaýǵa oraı Almaty oblysy Panfılov aýdany Almaly aýylyndaǵy Eltindi batyr atyndaǵy orta mekteptiń tarıh pániniń muǵalimi Molot Soltanaev osyndaı pikir bildirdi, dep habarlaıdy QazAqparat tilshisi.

«Ustaz» degen sózdiń «Otan», «Ar», «Adamgershilik» sııaqty qasıetti uǵymdardyń qatarynda atalýy teginnen-tegin emes. Óıtkeni, kez kelgen eldiń erteńi - bilimdi býynnyń ıeliginde bolatynyn eskersek, onda olardy búgingi tańda tárbıelep jatqan pedagogtardyń róli orasan zor ekeni óz-ózinen-aq belgili. Ult ustazy, qazaq rýhanııatynyń kóshbasshysy Ahmet Baıtursynov: «Mekteptiń jany - muǵalim. Muǵalim qandaı bolsa, mektebi de sondaı bolmaqshy. Demek, muǵalim bilimdi bolsa, bilgen bilimin basqaǵa úırete biletin bolsa, ol mektepten balalar kóbirek bilim alyp shyqpaqshy. Solaı bolǵan soń, eń áýeli, mektepke keregi - bilimdi, pedagogıka, metodıkadan habardar, oqyta biletin muǵalim» - depti.

Arada bir ǵasyr ótse de, Alash arysynyń bul sózi áli de kún tártibinen túsken joq. Qaıta jahandaný úrdisi beleń ala bastaǵan búgingi kúnde onyń kókeıkestiligi tipten arta túsýde. Bul máseleniń durys sheshim tabýy - álemdegi damyǵan 30 eldiń qataryna qosylýǵa talpynyp otyrǵan qazirgideı kezeńde tipten zor mańyzǵa ıe.

«Osyndaı syndarly sátte ultymyzdyń salt-dástúrin qadirleıtin, adamı ulttyq qundylyqtardy boıyna sińirgen, izdenimpaz, shyǵarmashyl, jańalyqqa jany qumar ıntellektilik potentsıaly joǵary, órkenıetke yntyǵatyn, bilim men ǵylymnyń tereńine úńile biletin jeke tulǵany qalyptastyrý - jańa formatsııa muǵalimderiniń tikeleı mindeti», - deıdi Molot Soltanaev.

Bul rette pedagog Elbasy Joldaýynda bilim berý salasy men jastardy tárbıeleý máselesinen osyndaı rýhty sezingenin aıtady.
Onyń aıtýynsha, eń qýantarlyǵy, qoǵamdaǵy basty tulǵa - pedagogtardyń bedelin arttyrý, ony arnaıy zańmen bekemdeý jónindegi óte oryndy usynys.

«Endi aldaǵy ýaqytta bul zań jobasy jarııa túrde talqylansa degen tilegim bar. Sonda kópshilik óz is-tájirıbelerinen kórgen-bilgen, kókeıge túıgen oı-pikirlerin ortaǵa salyp, pedagog mártebesi týraly zańnyń zaman talabyna saı bolýyna kóp septigin tıgizedi, Jalpy, barsha adam balasyn izgilikke, bilimdilik pen biliktilikke tárbıeleıtin muǵalimderdiń mártebesi eshqashan tómendemek emes, tómendemeıdi de! Óıtkeni, adamzat barda - adamı qundylyqtardy qasterlep, izgi amaldarǵa úndeıtin ustaz ulaǵaty da máńgilik jasaı bermek! Elbasymyzdyń jańa Joldaýy buǵan kózimizdi taǵy da bir ret anyq jetkizip, senimimizdi arttyrdy»,- deıdi ardager ustaz.

Molot Soltanaev - oqý-aǵartý salasynda jarty ǵasyrdaı talmaı eńbek etken, onyń ishinde otyz jyldan astam basshylyq qyzmette bolǵan tájirıbeli ustaz, bilikti maman.

«Bilim berý isiniń úzdigi», birneshe medaldyń ıegeri, Qazaqstan Jýrnalıster odaǵynyń múshesi, birneshe poezııalyq jáne prozalyq kitaptardyń avtory.