Muǵalimge jumysyna negizsiz aralasýdan qorǵaný quqyǵy beriledi - Kúlásh Shámshıdınova
««Pedagogtar mártebesi» týraly zań jobasynda eń aldymen biryńǵaı pedagog túsinigi bar. Búgin de pedagog jáne oǵan teńestirilgen tulǵalar degen túsinik baryn bilesizder. Sol sebepti, belgili bir shyǵyndy talap etetin biryńǵaı túsinik engizilip jatyr. Sebebi, bazalyq eńbekaqynyń deńgeıi ártúrli. Sonymen birge, eńbek demalysy boıynsha bólinetin aqshanyń da deńgeıi árqalaı. Sol sebepti, biryńǵaı pedagog túsinigin engizetin bolsaq, barlyǵyna birdeı jaǵdaı jasalady», - deıdi Kúlásh Shámshıdınova Úkimettiń baspasóz ortalyǵynda.
Mınıstrdiń aıtýyna qaraǵanda, zań boıynsha pedagogtyń kásibı quqyǵy, uıymnyń qoǵamdyq ómirine atsalysý quqyǵy, kásibı mindetin oryndaý jolyndaǵy materıaldyq-tehnıkalyq qamtamasyz etý quqyǵy, pedagogtyń kásibı jumysyna negizsiz aralasý jaǵdaıynan qorǵaný quqyǵy, ar-namysyn qorǵaý quqyǵy berilgeli otyr.
«Bul másele boıynsha, Ákimshilik quqyqbuzýshylyq týraly kodekske ózgerister engizilýde. Eger joǵaryda atalǵan jaǵdaılar boıynsha muǵalimniń quqyǵy buzylatyn bolsa, onda azamat jaýapkershilikke tartylady. Máselen, álgi azamatqa birinshiden eskertý jarııalansa, ekinshiden aıyppu salynady. Aıyppuldyń mólsheri basqa sanattaǵy tulǵalarǵa qoldanylyp jatqan tájirıbe boıynsha aıqyndalady», - deıdi mınıstr.
Sonymen birge mınıstr muǵalimderdi kótermeleý tetikteri, olardy áleýmettik kepildikter qarastyrylyp, pedagogtardyń mártebesi de zańnan tys qalmaıtynyn jetkizdi.