Muǵalimderge 56 kúndik demalys beriledi

NUR-SULTAN. QazAqparat – Bıyldyń 26 mamyry men 17 maýsymy aralyǵynda «Jazǵy mektep» jumys isteıdi. Bul týraly QR Bilim jáne ǵylym mınıstrliginiń Mektepke deıingi jáne orta bilim komıtetiniń tóraǵasy Gúlmıra Kárimova aıtty, dep habarlaıdy QazAqparat tilshisi.

Onyń aıtýynsha, pandemııa, shekteý sharalary kezinde oryn alǵan bilimdegi olqylyqtardyń ornyn toltyrý jáne bilim sapasyn arttyrý maqsatynda 2022 jyldyń 26 ​​mamyry men 17 maýsymy aralyǵynda «Jazǵy mektep» jumys isteıdi.

Jazǵy mekteptiń maqsaty – belsendi túrde oqýshylardyń bilimin tereńdetý. Jazǵy mektepte bilimdi tolyqtyrý boıynsha oqý protsesi mekteptiń bekitilgen jumys oqý josparyna sáıkes júzege asyrylady. Jazǵy mektepke 1-8 jáne 10 synyp oqýshylary qatysady. Jazǵy mektepte bilim alý tegin. Bilim berý uıymy sabaqtardyń ıkemdi kestesin jasaıdy.

Bilim berý uıymynyń basshysy Jazǵy mekteptiń jumys isteýi týraly buıryq shyǵarady. Bilim berý uıymy qol jetkizilmegen oqý maqsattaryn eskere otyryp, Jazǵy mekteptiń jumys josparyn jasaıdy jáne oqý protsesiniń uıymdastyrylýyn jáne oqýshylardyń oqý jetistikterin baqylaıdy.

Jazǵy mektep baǵdarlamasyna alshaqtyqty joıý pánderi boıynsha oqý sabaqtarynan basqa, jobalyq jáne ǵylymı-zertteý jumystary, zerthanalyq jumystar, synyptan tys jumystardyń keń aýqymy, dárister, semınarlar, shyǵarmashylyq stýdııalar, sporttyq-shyǵarmashylyq is-sharalar men ekskýrsııalar, ashyq aýada is-sharalar kiredi.

Taratylǵan málimetke qaraǵanda, jazǵy mektep jumysyn uıymdastyrý kezinde muǵalimder bıylǵy oqý jylyna bekitilgen júktemesi aıasynda 17 maýsymǵa deıin jumys isteıdi, sodan keıin muǵalimderge 56 kúndik demalys beriledi.