Muǵalimderdiń esep berý júktemesin azaıtý qajet - Premer-Mınıstr

ASTANA. QazAqparat - Pedagogterdi attestatsııadan ótkizý rásimderin jetildirý kerek. Bul týraly Úkimet otyrysynda QR Premer-Mınıstri Álıhan Smaıylov aıtty, dep habarlaıdy QazAqparat tilshisi.

«Memleket basshysy azamattardy áleýmettik qoldaý boıynsha naqty tapsyrmalar berdi. Osy oraıda Eńbek mınıstrligi múgedektigi bar jáne olarǵa kútim jasaıtyn, sondaı-aq asyraýshysynan aıyrylǵan adamdarǵa tólenetin járdemaqylardyń mólsherin arttyrýdy jáne tóleýdi qamtamasyz etýi tıis. Sonymen qatar, zııandy eńbek jaǵdaıyndaǵy jumysshylar úshin arnaıy tólemder engizý jóninde sharalar qabyldaý kerek. Bul oraıda, otandyq jáne halyqaralyq tájirıbeni jan-jaqty zerdeleý qajet», - dedi Á. Smaıylov Úkimet otyrysynda Prezıdenttiń QR Parlamenti sessııasynyń ashylýynda bergen tapsyrmalaryn iske asyrý barysyn talqylaý kezinde.

Budan bólek Úkimet basshysy pedagogterdi attestatsııadan ótkizý rásimderin jetildirý kerek ekenin aıtty.

«Muǵalimderdi «qaǵazbastylyqtan» bosatyp, esep berý júktemesin azaıtý qajet. Biz tájirıbeli kadrlardy baǵalap, mamandardyń jańa býynyn tárbıeleýimiz kerek. Oqý-aǵartý mınıstrligi bul úshin barlyq tıisti sharalardy qabyldaýy tıis. Sonymen qatar, «Ǵylym jáne tehnologııalyq saıasat týraly» zań jobasyn sapaly ázirleýdi qamtamasyz etý qajet. Ǵylym jáne joǵary bilim mınıstrligi «Atameken» ulttyq palatasymen birlesip, bul jumysqa ekonomıkanyń túrli sektorlarynan bıznes ókilderin tartýy kerek», - dedi Premer-Mınıstr.

Á. Smaıylov Densaýlyq saqtaý mınıstrligi medıtsına qyzmetkerleriniń quqyqtaryn qorǵaý, dárigerlerge qatysty qylmystyq zańnamany izgilendirý jónindegi sharalardy sapaly pysyqtaýy qajet ekenin aıtty. Bul ózgerister dárigerdiń jaýapkershiligin tómendetýge emes, ony qorǵaýǵa baǵyttalýy tıis.