Muǵalimderden on kúnde 600-den astam ótinish-aryz tústi – mınıstrlik

ASTANA. QazAqparat – 10 kún buryn ǵana qurylǵan «Pedagogti qorǵaý» Telegram-chatyna 600-den astam suraq pen ótinish tústi. Bul týrpaly Oqý-aǵartý mınıstrliginiń baspasóz qyzmetinen málim etti, dep habarlaıdy QazAqparat.

Chat qurylǵan 10 kúnde oǵan 25 myńnan astam adam qosylǵan.

«Osy ýaqyt ishinde muǵalimderden 600-den astam suraq pen ótinish tústi. Suraqtardyń basym bóligi muǵalimder quqyǵynyń buzylýyna qatysty. Atap aıtqanda, olardy mindetinen tys jumystarǵa tartý, artyq esep talap etý. Sondaı-aq muǵalimderdiń attestatsııasyna, sanat berý, oqý júktemesin bólý jáne taǵy basqasyna qatysty suraqtar túsip jatyr», - delingen vedomstvo habarlamasynda.

Málim etilgendeı, Telegram-chatqa túsken barlyq aqparat tekseriledi.

«Mamandarymyz jedel túrde keri baılanys jasap, muǵalimderdiń árbir ótinishine jaýap beredi jáne qajet bolǵan jaǵdaıda tıisti shara qabyldaıdy. Muǵalimderdiń suraqtary men ótinishterine der kezinde jaýap berý úshin arnaıy jumys toby qurylǵanyn atap ótkim keledi. Onyń quramyna komıtettiń, bilim salasynda sapany qamtamasyz etý aýmaqtyq departamentteriniń jáne oblystyq bilim basqarmalarynyń ókilderi bar. Telegram-chat muǵalimder quqyǵyn buzý faktilerin barynsha azaıtýǵa kómektesetinine senemiz», - dedi Oqý-aǵartý mınıstrligi Bilim salasynda sapany qamtamasyz etý komıtetiniń tóraǵasy Ernur Dáýenov.

Komıtet chatty jaqsartý jáne odan ári jetildirý boıynsha jumys istep jatyr. Muǵalimderdiń suraqtaryna jaýap berýden basqa, chatta muǵalimder úshin paıdaly aqparat jarııalanady. Mysaly, jalaqy kalkýlıatory, muǵalimderdiń qyzmetine baılanysty zańdar men normatıvter, jıi kezdesetin jaǵdaılardy sheshý jaǵdaılarynyń mysaldary.

«Pedagogti qorǵaý» Telegram-chaty iske qosylatyny týrady buǵan deıin jazǵan bolatynbyz.