Muǵalimder jalaqysyz otyr: Abaı oblysynyń ákimdigi atalǵan máselege jaýap berdi

SEMEI. QazAqparat – Áleýmettik jelide Abaı oblysynda ustazdardyń birneshe aı boıy jalaqy almaı júrgendigi jaıly aqparat tarady. Osynyń aq-qarasyn anyqtaý úshin QazAqparat tilshisi oblystyq Bilim basqarmasyna habarlasyp kórdi.

Facebook jelisinde jańadan qurylǵan Abaı oblysynda muǵalimderdiń jalaqysyz júrgendigi jaıly aqparat tarady.

Jeli qoldanýshysy, jýrnalıst Qýanysh Rahmetollauly ustazdardyń 3 aıdan beri aılyq almaǵanyn jazǵan.

«Keshe Semeıdegi ózim tanıtyn bir muǵalimmen sóılestim. Azyq-túlik turmaq, kúndelikti jumysqa qatynaý úshin jolǵa ázer aqsha tabamyz deıdi. Qaryzdan qaryzǵa batyp, ne isterin bilmeı júr. Sóıtse bul Semeıdegi bir muǵalimniń emes, Abaı oblysyndaǵy ustazdardyń basynan ótkerip otyrǵan qazirgi jaǵdaıy», - deıdi ol.

Atalǵan máseleniń anyq-qanyǵyn bilý úshin oblystyq bilim basqarmasyna habarlasyp kórdik.

«Óńirlerdiń bólinýine baılanysty osyndaı qıyndyqtardyń týyndaǵany ras. Biraq qazir qarjylandyrý júrgizilip, muǵalimder eńbekaqysyn alyp jatyr. Naqty aıtqanda, olarǵa jalaqyny 17 qazannan tólep bastadyq. Árbir kommýnaldyq mekemeniń shoty bolatyndyǵy belgili. Sol shottardy ashqan bilim berý uıymdarynyń barlyǵyna aqsha túsip qoıdy», - deıdi basqarmanyń baspasóz hatshysy Aqjigit Abzalbek.

Onyń aıtýynsha, muǵalimderge 3 aı emes, eki aı jalaqy tólenbegen.