Muǵalimder tildi ne úshin oqytyp jatqanyn umytyp bara jatqan syńaıly - ǵalym K.Qonaqova

ASTANA. 16 mamyr. QazAqparat - Qazirgi kezde biz oqýshylarǵa tildi ne úshin oqytyp jatqanymyzdy umytyp bara jatqan sııaqtymyz. Búgin Astanadaǵy Qazaq ulttyq óner ýnıversıtetinde bastalǵan QR Fılologtarynyń I sezinde Abylaıhan atyndaǵy Halyqaralyq qatynastar jáne álemdik tilder ýnıversıtetiniń monıtorıng jáne ishki aýdıt bóliminiń basshysy Klara Qonaqova osylaı aıtty.

«Ashyǵyn aıtý kerek, búginde Qazaqstanda qazaq tili ǵana emes, orys tili de lastanyp barady. Leksıkaǵa ózge tilderdiń sózderi kirigip, ana tilindegi sózder durys qoldanylmaıdy. Sóz saptaýdyń stılıstıkalyq máni joıylyp barady. Termınder durys aýdarylmaıdy. Bunyń barlyǵy halyqtyń lıngvıstıkalyq qabiletine nuqsan keltiredi. Sondyqtan memlekettiń tildik saıasatyn durys jolǵa qoıǵan jón», - dep atap kórsetti K.Qonaqova. Ǵalymnyń aıtýynsha, búginde muǵalimderdiń ózderi tildi ne úshin oqytyp jatqandaryn da bilmeı jatady. «Biz tildi ne úshin oqytyp jatqanymyzdy umytyp bara jatqan sııaqtymyz. Osynyń saldarynan balalar aınaladaǵy qubylystardy burys qabyldap, shynaıy ómirdiń mánin túsinbeı júredi», - deıdi K.Qonaqova.