Muǵalim, oqýshy, endi biri jattyqtyrýshy: Óskemennen Tartyl Fest fınalyna bes úmitker attanady
Qazaqstandaǵy alǵashqy týrnıkke tartylý dodasy Qonaev qalasynda bastaý alyp, keıinnen eldiń óńirlerin jaǵalaı kele 2022 jyldyń 30 tamyzynda Óskemende de tartysty ótken bolatyn. Sol kezde oblys boıynsha festıvalde 250-ge jýyq adam baq synaǵan. Onyń ishinde úzdik 27 qatysýshy marapattaldy. QR Prezıdenti janyndaǵy «Dara» daryndylardy qoldaý qory muryndyq bolyp otyrǵan jarysta 1 oryn ıelengender – 200 myń teńgeden, 2 oryn – 100 myń teńgeden, 3 oryn – 50 myń teńgeden alǵan edi.
Endi 18 aqpanda elordada «Tartyl Fest» respýblıkalyq týrnıriniń grand-fınaly ótkizilmek. Oǵan óńirlik irikteý jarystarynda úzdik nátıje kórsetken 170 sportshy qatyspaq. Qatysýshylardyń jasy – 14-51 jas aralyǵynda. Bul dodaǵa Óskemennen 5 adam attanaıyn dep otyr. Olar – Mansur Ýálıev, Sergeı Zaleskov, Ahmet Terlikbaev, Radmır Temirbolatov jáne Egor Nogın. Endi grand-fınalda qala namysyn qorǵaıtyndardy jeke-jeke tanystyryp shyǵaıyq.
Mansur Ýálıev 11 jasta. 4 jasynan beri sportpen aınalysyp keledi. Armrestlıng, jeńil atletıka jáne dzıýdoǵa qatysqan. Sportqa bet burýyna qol kúresten bapker bolyp jumys isteıtin ákesi sebepker.
- Ózime týrnıkke tartylǵan unaıdy. «Tartyl Fest» jobasy jaıly ákem tanysynan estipti. Maǵan qatysýǵa usynys jasaǵanda birden kelistim. Sóıtip, daıyndyqty bastap kettik. Kúnine 10 retten 10 márte qaıtalap tartylyp júrdim, - deıdi ol.
Jarys kezinde Mansur 36 ret tartylyp, 55 kelige deıingi salmaqta 18 jasqa deıingi qatysýshylar arasynda jeńimpaz atanǵan bolatyn.
- Qazir armrestlıngten sport sheberligine úmitkermin. Astanaǵa baryp baq synaýǵa daıyndalyp júrmin. Osyndaı týrnırdiń uıymdastyrylǵanyna óte qýanyshtymyn. Barlyq qatysýshylarǵa sáttilik tileımin, - deıdi Mansur Ýálıev.
Sergeı Zaleskov mektepte dene shynyqtyrý páninen sabaq beredi. Jasy 28-de.
- Bala kúnimde sportqa onsha jaqyn bolmadym. Áljýaz bolǵandyqtan synyptastarym únemi mazaq etetin. Birde ózimdi qaırap, týrnıkte joq degende 5 ret tartylýǵa sert ettim. 10 synypta oqyp júrgende týrnıkte jaqsy tartyla bastadyq. Solaı qyzyǵýshylyǵym da artty. Áskerı dalalyq oqý-jattyǵý jıynynda 29 ret tartylyp, birinshi oryn aldym. Beıresmı jeke rekordym 40-qa jetti, - dep eske aldy ol.
Sergeı 2018 jyly oblystyq irikteýden ótip, 5 adam bolyp Aqtaýǵa halyq oıyndaryna barypty. Sonda salmaq boıynsha tartylǵandar arasynda úshinshi oryn ıelengen.
- «Tartyl Fest» týraly «Instagram» áleýmettik jelisinen bildim. Óskemendegi jarys joǵary deńgeıde uıymdastyryldy. Qala ákimi de qatysyp, týrnıkke tartyldy. Jalpy tóreshiler qatal, biraq ádil boldy, sondyqtan eshkim renjigen joq. Bul joba kópshilikti ózin-ózi damytýǵa ıtermeledi, dep sanaımyn. Shynymdy aıtsam, bir-eki jyl buryn mundaı jetistikke jetemin dep oılaǵan da emespin. Endi Astanaǵa baryp, baq synap kórmekpin. Meniń tilegim, dál osyndaı jarys kem degende 2-3 jylda bir ret ótkizilip tursa jaqsy bolar edi, - deıdi Sergeı Zaleskov.
Paýerlıftıngten sport sheberi Ahmet Terlikbaev 32 jasta. Bodıbıldıngten respýblıkalyq dodada júldeger atanǵan ol jeke jattyqtyrýshy bolyp jumys isteıdi.
- Mektep oqyp júrgende synyptasym erkin kúreske barýǵa shaqyrdy. Kóp oılanbaı kelise kettim. Týrnıkke de bala kúnnen tartylyp kelemin. Úıde de týrnık jasatyp, kúnde jattyǵyp júrdim. «Tartyl Fest» jobasy týraly jattyǵý zalynda júrgende kezdeısoq estip qalyp, qatysýǵa sheshim qabyldadym. Óıtkeni ózimniń jaqsy nátıje kórsetetinime senimdi boldym, - deıdi ol.
Ahmet Terlikbaev bolashaqta bodıbıldıng pen paýerlıftıngten jarystarǵa qatysyp, bıik belesterdi baǵyndyrǵysy keledi. Qazir sol úshin kúndelikti jattyǵyp, tynbaı daıyndalyp júr.
- Ózimniń jattyqtyrýshym bar. Ol maǵan baǵyt berip, jol nusqap otyrady. Hobbıim de, jumysym da - sport. Osy baǵytty tańdaǵannan keıin jetistikterge jetkim keledi. Týrnıkke tartylý jarysynda fınalǵa shyqqanyma óte qýanyshtymyn. Jeńiske jetý úshin barymdy salamyn!, - deıdi Ahmet.
Radmır Temirbolatov ta bala kúnnen beri sportty janyna serik etip keledi. Qazir jasy 18-de.
- Sporttyń belgili bir túrine qatysqan emespin. Jattyǵý jasap, dene bitimimdi shynyqtyryp kelemin. Bapkerim joq, ózim birneshe shaqyrym júgirip, otjımanııa jasap, týrnıkke tartylamyn. Naqty týrnıkke qatysty aıtar bolsam, keshki ýaqytta aýladaǵy dostarymmen birge tartylyp júrdik. Kún ótken saıyn qyzyǵýshylyǵym arta berdi. Kóshede ketip bara jatqanda týrnıkti kórsem aınalyp ótpeıtin boldym. Sóıtip, týrnıkke tartylý ádetke aınalyp ketti desem de bolady. Ázirge ózimniń jeke rekordym - 35, - deıdi ol.
Radmır respýblıkalyq týrnıkke tartylý festıvali týraly dostarynan bilgen. Oılanbastan qatysýǵa bel sheshken.
- 30 tamyzda tańerteńnen Amfıteatr alańyna jurt jınala bastady. Qatysýshylardy tirkeý saǵat 11:00-ge deıin júrgizildi. Sharanyń ashylý saltanaty saǵat 12:00-de bastaldy. Shymyr, ózine senimdi jigitter arasynda kúshińdi synaý degen keremet qoı. 18 jasqa deıingi 70 keliden joǵary salmaqta qatystym. Barymdy salyp, 27 ret tartylyp, jeńimpaz atandym. Shynymdy aıtsam, birinshi oryn alamyn dep oılamaǵan edim, - deıdi Tartyl fest fınalısi.
Radmır Temirbolatov Geologııalyq barlaý kolledjinde oqıdy. Grand fınalda jeńimpaz atansa, utysynyń bir bóligin oqý aqysyn tóleýge jumsamaq.
Egor Nogınniń jasy 17-de. Kámelettik jasqa deıingi 55-70 keli aralyǵyndaǵy salmaqta óner kórsetken ol 28 ret tartylyp, birinshi oryn ıelengen. Endi Astanaǵa baryp, óner kórsetýge qyzý daıyndyq ústinde.
- Atam shańǵy jarysynan sport sheberi, meni osy sport túrine bala kezimnen baýlyǵan. Shańǵyshy retindegi kásipqoı mansabym nátıjeli bolmaǵan soń qysqy polıatlonǵa aýystym. Onda ózimdi jaqsy kórsete bastadym. Prezıdenttik kópsaıys boıynsha sport sheberi atandym. Al týrnıkke tartylǵan ózime unaıdy. Qazirgi ýaqytta jeke rekordym - 33. Bul jarysqa aqsha úshin emes, aldaǵy álem chempıonatynda el namysyn qorǵaý úshin qatystym, - deıdi ol.
Álem chempıonatyna qatysý - Egordyń burynnan kele jatqan armany. Sol qalaýyna jetý úshin esh aıanyp qalmaıdy.
- Óskemen qalasyndaǵy №39 orta mektepte 11-synypta oqımyn. Mundaı jarystar jıi ótkizilip tursa deımin. Sebebi sol arqyly adamdardy salaýatty ómir saltyn ustanýǵa shaqyryp, sportqa tartýǵa bolady. Talaı dosym «Tartyl Fest» festıvaliniń 2-shi maýsymyna daıyndalyp jatyr. Sondyqtan bul joba osymen úzilip qalmaıdy degen senimdemin, - deıdi Egor Nogın.