Muǵalim men dırektor arasyndaǵy sottasý degendi toqtatý kerek - mınıstr

TALDYQORǴAN. QazAqparat – Bıyldan bastap muǵalimdermen sottasatyn mektep basshylary mektepte istemeýi kerek. Taldyqorǵanda aǵartý salasynyń mamandarymen ótken jıynda Oqý-aǵartý mınıstri Ǵanı Beısembaev bilim ordasyndaǵy qýdalaý máselesine qatysty osylaı dedi, dep habarlaıdy QazAqparat tilshisi.

«Mektepterde qýdalaý máselesi bolmaýy kerek. Bıyldan bastap muǵalimdermen sottasatyn mektep basshylary mektepte istemeýi kerek. Unamasa, ondaı muǵalimderdi jumysqa qabyldamaý kerek. Al qabyldadyńyz ba, tárbıeleńiz. Búkil ujymmen aqyldasý kerek. Men de mektep basshysy bolǵan adammyn. Maǵan da aıtqan «ujymda jaman muǵalimder bar» dep. Sol muǵalimdermen bir-birimizdi tárbıeleı otyryp, úlken dárejege jettik. Menińshe, muǵalimniń jamany joq. Tek onyń eńbegin kórsete alatyn dırektorlar joq pa degen oıǵa kelemin. Sondyqtan mundaı keleńsizdikke el aýmaǵynda jol bermeýimiz kerek. Bıyldan bastap muǵalim men dırektor arasyndaǵy sottasý degendi toqtatý kerek. Sony sizderge tapsyramyn», - dedi Oqý-aǵartý mınıstri Ǵanı Beısembaev.

Buǵan deıin mınıstr muǵalimderdi zańbuzýshylyqpen qabyldaý faktileri eń kóp tirkelgen aımaqtardy ataǵan bolatyn.

Mundaı jaǵdaı boıynsha Almaty oblysynyń Qarasaı aýdany kósh bastap tur.

Sondaı-aq Oqý-aǵartý mınıstri Ǵanı Beısembaev «Altyn belgi» alý úshin ata-analar túrli qýlyq-sumdyqqa baratynyn sóz etti.

Mınıstr oqýshylar arasyndaǵy tóbeleske pikir bildirip, birinshi kezekte ata-ana balasynyń tárbıesine jaýapkershilikpen qaraýy kerektigin qadap aıtty.