Mudaraban Capital boıynsha 2 kúdiktige halyqaralyq izdeý jarııalandy

ALMATY. QazAqparat - Almaty qalalyq polıtsııa departamenti bastyǵynyń orynbasary Rýstam Ábdirahmanov Mudaraban Capital qarjy pıramıdasyna qatysty qozǵalǵan is jaıynda túsinik berdi, dep habarlaıdy QazAqparat tilshisi.

«Qazirgi tańda qylmystyq protseske 14 adam tartyldy, olarǵa Qylmys kodeksiniń 217-baby 3-bólimi boıynsha aıyp taǵylǵan. On kúdikti qamaýda otyr, ekeýine halyqaralyq izdeý jarııalandy, bireýi kepilmen bosatyldy, bireýi eshqaıda ketpeıtini jaıly qolhat berdi»

, - deıdi Rýstam Ábdirahmanov.

Sonymen qatar, ol polıtsııa blogerlerdi qamaýǵa alý arqyly, negizgi kúdiktilerdi isten jaltartpaq degen aqparatty joqqa shyǵardy.

«Qarjy pıramıdasynyń salymshysy Baǵıla Dosmaıylova meni tikeleı aıyptady. Onyń aıtýynsha, men «isti jabýǵa asyǵyp otyr ekenmin». 14 adam kúdikke ilingen qylmystyq isti men qalaı jaýyp tastaımyn? Aıta keteıin, Dosmaıylova naýryz aıynyń sońynda Bas prokýratýranyń aldyna jalǵyz adamdyq pıket ótkizdi. Qolyndaǵy plakatta «Meıirjandy qamańdar» dep jazylǵan. Keshe Dosmaıylovanyń blogerlerge qatysty pikiri ózgerdi. Onyń sebebin bilmeımin. Ony biz teksermeımiz. Óıtkeni, ol kisi bizde jábirlenýshi bolyp tanylǵan. Onyń ústine aýrýhanada jatyr. Múmkin aqshasyn qaıtaryp alǵan bolar»

, - dedi ol.

Aıta keteıik, 11 sáýir kúni Baǵıla Dosmaıylova astanadaǵy Іshki ister mınıstrligi ǵımaratynyń aldynda ózin órtep jibergen bolatyn.

19 sáýir kúni Almatyda «Mudaraban Capital» qarjy pıramıdasynyń 4 uıymdastyrýshysy qamaýǵa alynǵany týraly jazǵanbyz.

Keıin tanymal vaınerler Meıirjan Tórebaev pen Meıirhan Shernııazov 10 táýlikke qamaýǵa alyndy.