MSQ jyl basynan beri medıtsına uıymdaryna 868,3 mlrd teńge tóledi

NUR-SULTAN. QazAqparat - «Áleýmettik medıtsınalyq saqtandyrý qory» KEAQ jyl basynan beri memlekettik tapsyrys boıynsha kórsetilgen qyzmetter úshin 868,3 mlrdteńge tóledi. Qarjy kepildendirilgen tegin medıtsınalyq kómek paketi (TMKKK) sheńberinde bólindi, dep habarlaıdy QazAqparat atalǵan uıymnyń baspasóz qyzmetine silteme jasap.

«2019 jyldyń 6 jeltoqsandaǵy málimetter boıynsha, Qormen kelisimshart bekitken jetkizýshi kompanııalarǵa 868,3 mlrdteńge tólendi. Bul kepildendirilgen medıtsınalyq kómek paketi sheńberinde bekitilgen kelisimsharttardyń jalpy somasynyń 91% protsenti», - dedi MSQ basqarma tóraǵasynyń orynbasary Ermek Pirimbetov.

2019 jyly MSQ kepildendirilgen kómek túrlerin kórsetýge qulshynys bildirgen medıtsına uıymdarymen 948,6 mlrd teńgeniń kelisimshartyn bekitken bolatyn. Bul ótken jyly bólingen qarjydan 16 paıyzǵa artyq.

«Jumys kestege saı júrip jatyr. Bólingen qarajat medıtsına mekemeleriniń operatsııalyq shyǵyndaryn óteýge jetkilikti», - dedi Ermek Pirimbetov.

Bıyl memlekettik tapsyrysty oryndaýǵa 1412 medıtsına uıymy atsalysyp jatyr. Onyń ishinde 728 jeke menshik klınıka da bar, ıaǵnı ol 52 paıyzdy quraıdy.

Memleketten tapsyrys alǵan jeke menshik klınıkalar sany jaǵynan Shymkent, Nur-Sultan, Almaty qalalary men Qyzylorda jáne Jambyl oblystary kósh bastap tur.

Esterińizge sala ketsek, MSQ 2018 jyldan bastap TMKKK jáne mindetti áleýmettik medıtsınalyq saqtandyrý (MÁMS) paketteriniń qarjylyq operatory bolyp tabylady jáne halyqqa kórsetiletin medıtsınalyq qyzmetterdi QR Úkimeti bekitken tártip boıynsha satyp alady.