Mozambıktiń soltústiginde jaýyngerler 50 adamdy qyryp tastady

KABÝ-DELGADÝ. QazAqparat – «Islam memleketi» terrorıstik tobyna (QR-da tyıym salynǵan) qatysy bar jaýyngerler Mozambıktiń soltústigindegi eki aýyl turǵyndaryn jappaı qyryp tastaǵan, dep habarlaıdy QazAqparat tilshisi «Ál-Jazıra» basylymyna silteme jasap.

Kýágerlerdiń aıtýynsha, ıslamshyl-kóterilisshiler qurbandardy Mýatıde aýylyndaǵy fýtbol alańyna aparyp óltirgen. Polıtsııanyń habarlaýynsha, keıingi úsh kúnde shabýyl jasaýshylar Mozambıktiń soltústigindegi gazǵa baı Kabý-Delgadý provıntsııasynda 50-den astam adamdy óltirip, múshelep tastaǵan. Kúsh kórsetý áli de jalǵasyp jatyr.

Mozambık polıtsııasynyń bas qolbasshysy Bernardıno Rafaeldiń aqparaty boıynsha, «Islam memleketine» qatysy bar sodyrlar Mıýdýmbe jáne Makomııa aımaǵyndaǵy birneshe aýylǵa shabýyl jasap, beıbit turǵyndardy óltirip, áıelder men balalardy urlap, úılerdi órtegen. Keıbir sarapshylar, tártipsizdiktiń túp-tórkini dinde emes, eldegi kedeılik pen teńsizdikte bolýy múmkin dep esepteıdi. Olar ózderin «Ash-Shabab» dep ataıtyn ıslamshylardyń Somalıde baılanysy joq ekenine senimdi.

Tártipsizdik saldarynan 2017 jyldan beri 2000-nan asa adam mert boldy, olardyń jartysynan kóbi – qarapaıym turǵyndar.

Ótken aıda jarııalanǵan Amnesty International esebi boıynsha, Kabý-Delgadýdaǵy shabýyldar gýmanıtarlyq daǵdarysqa ákep soqty. 300 000-nan asa adam qonys aýdarýǵa májbúr boldy jáne 712 000 turǵyn gýmanıtarlyq kómekke muqtaj.

Eske sala ketsek, bul sońǵy ýaqyttaǵy jıhadshylar jasaýy múmkin delingen alǵashqy terakt emes. Buǵan deıin ıslamshylar Frantsııa men Aýstrııa astanasy Venada sumdyq terakt jasaǵan bolatyn.

Avtor: Serikbol Qoshmaǵanbetov