Mototsıklmen túnde Petropavldyń Jambyl kóshesimen júrýge tyıym salyndy

PETROPAVL. QazAqparat – Petropavlda polıtseıler mototsıklshilerdiń túngi jarysynyń aldyn alý maqsatynda baqylaýdy kúsheıtti, dep habarlaıdy QazAqparat tilshisi.

Túngi mototsıkl jarysy – kóptegen qalaǵa tán máselelerdiń biri. Petropavldyń patrýldik polıtsııa batalonynyń qyzmetkerleri mototsıkl júrgizýshileriniń túngi tynyshtyqty buzýyna jol bermeý úshin baqylaýdy kúsheıtti. Tártip saqshylary ásirese túngi shabandozdar kóp júretin Jambyl kóshesin nazarda ustaıdy. Túnde mototsıklderdiń osy kóshe boıymen júrýine tyıym salynǵan.

«Baıkerler kóp jınalatyn jerlerdi Polıtsııa qyzmetkerleri arnaıy qadaǵalaıdy. «Tynyshtyqty buzý» babyna sáıkes, túngi saǵat 23.00-den bastap tańǵy saǵat 6.00-ge deıingi shýǵa 5 AEK mólsherinde aıyppul bar. Sol sebepti únemi túsindirý jumystary júrgiziledi. Kólikterin zańsyz jaraqtandyryp, tikeleı aǵyndy júıeni ornatatyndarǵa da jaza bar. «Kólik quraldaryn paıdalaný erejelerin buzý» baby boıynsha olarǵa 15 AEK mólsherinde aıyppul salynady», - deıdi Petropavl qalasy polıtsııa basqarmasy bastyǵynyń birinshi orynbasary Álibek Ǵabdýllın.

Jaz bastalǵaly Petropavlda 12 mototsıklshi túrli quqyq buzýshylyqtar, onyń 5-eýi túngi shý úshin jaýapqa tartyldy. Sondaı-aq eki dońǵalaqty kólik júrgizýshileri jaıaý júrginshi jolymen júrgeni úshin, tótenshe jaǵdaı jasap, mas kúıinde kólik júrgizgeni jáne tıisti qujattarsyz kólik basqarǵany úshin jazalandy.