Monshada otyryp terrorızmdi nasıhattaǵan úsh aqtóbelik 7 jylǵa sottaldy
№2 Aqtóbe qalalyq sotynda sottalýshylar Baǵdat Bısenbaev, Ádiljan Dáýletov jáne Ersaıyn Qulyntaıǵa qatysty qylmystyq is qaraldy.
Іs materıalyna súıensek, 2019 jyldyń 16 naýryzynda úsheýi monshada otyryp, tyıym salǵan taqyrypta sóz qozǵaǵan. Dinı aǵymdar týraly ashyq aıtyp, óz oılaryn bildirgen. Jýynýǵa barǵan ózge er adam olardyń áńgimesin tyńdap, kúdiktenip, barlyǵyn jazyp alǵan. Tergeý barysynda barlyǵyn da terrorızmdi nasıhattaǵany úshin kináli dep tapty.
Sottalýshy Baǵdat Bısenbaev, Ádiljan Dáýletovter kinásin birden moıyndaǵan. Úsheýiniń de turaqty jumysy joq. Al Ersaıyn Qulyntaı bolsa buǵan deıin de isti bolǵan.
Aıta keteıik, 2019 jyldyń 11 sáýirinde Ádiljan Dáýletov pen Ersaıyn Qulyntaı óz isin jalǵastyryp, 3 shilde kúni Reseıge, ári qaraı Sırııaǵa jolǵa shyqqanda ustaldy. Sonymen qatar ekeýinen de eskirtki zaty tárkilendi.
«Baǵdat Bısenbaev, Ádiljan Dáýletov, Ersaıyn Qulyntaı Qylmystyq kodekstiń «Terrorızmdi nasıhattaý nemese terrorızm aktisin jasaýǵa jarııa túrde shaqyrý», «Terrorıstik top qurý, oǵan basshylyq etý jáne onyń áreketine qatysý», «Esirtki, psıhotroptyq zattarmen, sol tektestermen ótkizý maqsatynsyz zańsyz jumys isteý» baptary boıynsha aıypty dep tanylyp, 7 jylǵa bas bostandyǵyn aıyrý jazasy taǵaıyndalsyn. Jazasyn qylmystyq atqarý júıesiniń qaýipsizdigi ortasha túzetý mekemesinde ótesin. Jazasyn óteý merzimi qamaýǵa alynǵan kúnnen bastap esepteledi», - dedi №2 Aqtóbe qalalyq sotynyń sýdıasy Temirjan Aldanov.