Monshada kóńil kótergen jemqorlyqpen kúres qyzmetkerlerine sot aıyppul saldy

KÓKShETAÝ. QazAqparat – Karantın kezinde monshada kóńil kótergen Sybaılas jemqorlyqqa qarsy is-qımyl agenttiginiń Aqmola oblysy boıynsha departamentiniń laýazymdy tulǵalaryna sot 10 aılyq eseptik kórsetkish kóleminde aıyppul taǵaıyndady, dep habarlaıdy QazAqparat tilshisi Aqmola oblystyq sotynyń baspasóz qyzmetine silteme jasap.

«2020 jylǵy sáýirdiń 21-de Kókshetaý qalalyq mamandandyrylǵan ákimshilik soty tótenshe jaǵdaı rejımin buzǵan jemqorlyqqa qarsy kúres qyzmetiniń úsh qyzmetkerine maksımaldy jaza taǵaıyndady. QR ÁQbK 32 baby sotqa quqyq qorǵaý organdarynyń qyzmetkerlerine qamaý jazasyn taǵaıyndaýǵa ruqsat etpeıdi. Atalmysh quqyqbuzýshylyqty jasaý kezinde onyń qatysýshylary quqyq qorǵaý júıesiniń qyzmetkerleri boldy. Sondyqtan, sot R.Turǵambekov, J.Aqmoldın, A.Qaǵarmanǵa 10 aılyq eseptik kórsetkish kóleminde aıyppul túrinde maksımaldy jaza taǵaıyndady», - dedi Aqmola oblystyq sotynyń baspasóz hatshysy Kúlásh Domalaqova.

Sonymen qatar, ol qalǵan ekeýiniń isi erteń qaralatynyn atap ótti.

Aıta keteıik, osyǵan deıin habarlaǵanymyzdaı, Aqmola oblysy boıynsha sybaılas jemqorlyqqa qarsy is-qımyl departamentiniń laýazymdy tulǵalary tótenshe jaǵdaı kezinde Kókshetaýdaǵy monsha kesheninde kóńil kóterip jatqan jerinde ustalǵan edi.

Keıin QR Sybaılas jemqorlyqqa qarsy is-qımyl agenttigi Aqmola oblystyq departamentiniń tergeý basqarmasy qyzmetkerleriniń tótenshe jaǵdaı rejımin buzý faktisi boıynsha qyzmettik tekserý júrgizdi.

Nátıjesinde 20 sáýirde agenttiktiń ortalyq apparatynyń tártiptik komıssııasynyń sheshimimen osy oqıǵaǵa qatysy bar jemqorlyqpen kúres qyzmetkerleriniń barlyǵy qyzmetinen qýyldy.

Al, oblystyq departament basshysy M.Tóleýbaev jeke qurammen aldyn alý jumysyn nashar uıymdastyrǵany úshin qyzmetine tolyq sáıkes emestigi túrinde jaýapqa tartyldy.