Monopolııalyq sýbekti tarıfterin zańsyz bekitken burynǵy departament basshysy ustaldy
14:17, 28 Aqpan 2020
NUR-SULTAN. QazAqparat - Pavlodar oblystyq tabıǵı monopolııalardy retteý departamentiniń basshysy qyzmettik ókilettigin teris paıdalanǵany úshin tergelip jatyr. Bul týraly QR Sybaılas jemqorlyqqa qarsy is-qımyl agenttiginiń tergeýshisi Qaısar Barjaqsynov málim etti, dep habarlaıdy QazAqparat tilshisi.
Onyń aıtýynsha, Pavlodar oblystyq sybaılas jemqorlyqqa qarsy qyzmeti óńirlik Tabıǵı monopolııalardy retteý departamentiniń burynǵy basshysyna jáne basqa da tulǵalarǵa qatysty qyzmettik ókilettigin teris paıdalaný faktisi boıynsha qylmystyq isti tergep jatyr.
«Atalǵan departamenttiń tabıǵı monopolııalar sýbektisiniń qyzmetterine tarıfti tótenshe retteýshi shara retinde zańsyz bekitkeni anyqtaldy. Ony kóterý úshin naqty negiz bolmaǵan. Ekibastuz qalasynyń jáne óńirdiń basqa kommertsııalyq kásiporyndaryna tarıfti negizsiz kóterý nátıjesinde jalpy somasy 150 mıllıon teńgege jýyq materıaldyq zalal keltirilgen», - dedi agenttik tergeýshisi.