Monopolııaǵa qarsy komıtet kómir naryǵyndaǵy jaǵdaıǵa baılanysty taldaý júrgizýde

ASTANA. QazAqparat - QR UEM Tabıǵı monopolııalardy retteý, básekelestikti jáne tutynýshylardyń quqyqtaryn qorǵaý komıteti (TMRBjTQQK) kómir tapshylyǵy jáne onyń baǵasynyń ósýi týraly kelip túsken shaǵymdarǵa jáne basqa málimetterge baılanysty kómir naryǵyndaǵy jaǵdaıǵa taldaý júrgizedi, dep habarlaıdy QazAqparat komıtettiń baspasóz qyzmetine silteme jasap.

Baspasóz qyzmetiniń habarlaýynsha, komıtet kelisilgen áreketter jáne kómirdi ótkizýde baǵalardy belgileý jáne ustap turý, shekteý bóliginde naryq sýbektileriniń óziniń ústem jaǵdaıyn teris paıdalaný belgilerin anyqtaýdy maqsat tutqan.

«Buzýshylyq belgileri tergeý júrgizýdi bastaýǵa negiz bolady, al rastalǵan faktiler ákimshilik jaýapkershilikke tartylady», delingen habarlamada.

Komıtet kómirdi ótkizý naryǵyndaǵy sýbektilerge monopolııaǵa qarsy zańnamany buzǵany úshin joǵary aıyppul sanktsııalary bar ekenin eskertedi.

«Baǵalardy belgileý jáne ustap turý (baǵalyq sóz baılasý), taýarlardy óndirýdi ne ótkizýdi negizsiz shekteý bóliginde básekelestikke qarsy kelisilgen áreketterdi jasaý, sondaı-aq jasandy tapshylyq jasaý bóliginde naryq sýbektileriniń óziniń ústem nemese monopolııalyq jaǵdaıyn teris paıdalaný faktileri QR ÁQBtK-niń 159-baby boıynsha saralanady, oǵan sáıkes osy buzýshylyq monopolıstik qyzmetti júzege asyrý nátıjesinde alynǵan monopolııalyq kiris tárkilene otyryp, shaǵyn nemese orta kásipkerlik sýbektilerine monopolıstik qyzmetti júzege asyrý nátıjesinde alynǵan kiristiń (túsimniń) 3 %-y, iri kásipkerlik sýbektilerine - 5 %-y mólsherinde aıyppul salýǵa ákep soǵady», - dep habarlaıdy TMRBjTQQK baspasóz qyzmeti. 

Komıtet azamattarǵa kómirdi joǵary baǵamen satý faktileri kezdesken jaǵdaıda saıtta kórsetilgen vedomstvonyń  aýmaqtyq organdaryna júginýdi usynady.