Monopolıstke 1 mlrd teńgege aıyppul salyndy - Bas kólik prokýratýrasy

ASTANA. QazAqparat - Bas kólik prokýratýrasy qylmystyq qýdalaý jáne básekelestikti qorǵaý salasyndaǵy ýákiletti organdarymen birlesip, naryq sýbektileriniń ústem nemese monopolııalyq jaǵdaıyn teris paıdalaný faktileriniń jolyn kesý boıynsha júıeli negizde jumys júrgizedi, dep habarlaıdy QazAqparat.

Osyndaı is-sharalardyń birinde «Otyn – energetıkalyq keshen-Qazaqstan» Saýda úıi» JShS anyqtaldy, ol temir jol shekaralarynda suıyq júkterdi qabyldaý, saqtaý jáne bosatý boıynsha qyzmetter kórsetýge monopolııalyq artyqshylyǵyn paıdalanyp, 2 jyl ishinde negizsiz «ústeme paıda» alǵan.

«Nátıjesinde, 15 naýryz kúni ÁQBtK-niń 159-babynyń 3-bóligi boıynsha, ıaǵnı naryq sýbektisiniń monopolııalyq joǵary baǵalardy belgileý jáne ustap turý arqyly óziniń monopolııalyq jaǵdaıyn teris paıdalanǵany úshin iri kásipkerlik sýbektisine qatysty ákimshilik is qozǵaldy. Jınalǵan materıal 20 sáýirde Astana qalasynyń mamandandyrylǵan aýdanaralyq ákimshilik sotynda qaraldy, onyń nátıjeleri boıynsha monopolıst ákimshilik quqyq buzýshylyq jasaǵany úshin kináli dep tanyldy», - dep jazdy vedomstvo.

Sot ony 1 094 593 950 teńge kóleminde aıyppul tóleýge mindettedi jáne 579 826 102 teńge somasynda zańsyz alynǵan monopolııalyq tabysty tárkiledi.

Sot aktisi zańdy kúshine endi.