Monoqalalarda qazandyqtardyń 99 paıyzy jylý berý maýsymyna daıyn

ASTANA. 24 qyrkúıek. QazAqparat - Monoqalalarda qazandyqtardyń 99 paıyzy jylý berý maýsymyna daıyn.

Bul týraly búgin Úkimet otyrysynda QR Óńirlik damý vıtse-mınıstri Serik Nokın málim etti. «Tolyqtaı alǵanda monoqalalarda josparlanǵan jumystar aıaqtaldy. Ol kestege sáıkes júrgizilýde. 20 qyrkúıektegi jaǵdaı boıynsha 254 qazandyq nemese olardyń 99 paıyzy, jylýmen jabdyqtaý jelileriniń 513 shaqyrymy, elektrmen jabdyqtaý jelileriniń 1808 shaqyrymy, sýmen jabdyqtaý jáne sý burý jelileriniń 409 shaqyrymy daıyn»,-dedi ol. Vıtse-mınıstrdiń atap ótýinshe, 504 turǵyn úı, sondaı-aq birqatar áleýmettik nysandar boıynsha daıyndyq jumystaryn aıaqtaý kerek. «Negizinen monoqalalarda ınjenerlik jelilerdiń tozýy joǵary ekendigi baıqalady. Bul rette jóndeý jumystarynyń josparlanǵan kólemi negizinen aǵymdyq jóndeýlerge jatqyzylǵan. 27 monoqalanyń 17-sinde 100 G/kal saǵattan astam jylý kózi bar. Al, qalǵandarynda aýdandyq qazandyq jumys istep tur»,-dedi s. Nokın.