Monıtorıng toptarynyń jumysyna qandaı ózgerister engizildi

QARAǴANDY. QazAqparat – Qaraǵandy oblysynyń kásipkerler palatasynda monıtorıng toptarynyń jumysyndaǵy jańalyqtar týraly aıtyldy, dep habarlaıdy QazAqparat tilshisi.

Vedomstvoaralyq toptyń sheshimimen monıtorıng toptarynyń jumys algorıtmine ózgerister engizildi.

Budan bylaı barlyq reıdter infokazakhstan.kz saıtynda tirkelýi kerek.

Nysannyń ataýy jáne naqty mekenjaıy, sondaı-aq monıtorıngtik toptyń quramy mindetti túrde kórsetiledi.

Kásipker josparlanǵan bıznes-núktege barý týraly aldyn-ala bilmeıdi, biraq ol reıdtiń zańdylyǵyn QR-kod arqyly teksere alady. Júıege tirkelgennen keıin topta reıd ótkizýge 24 saǵat berledi. Monıtorıng aktisi elektrondyq túrde qalyptastyrylady.

«Tsıfrlyq tehnologııalar adam faktoryn boldyrmaıdy. Osylaısha, sybaılas jemqorlyq táýekelderi tómendeıdi. Kásipker monıtorıngtik toptardyń qyzmeti týraly aqparatqa qol jetkize alady. Biz nátıjelerdi taldaı alamyz», – dep atap ótti ÓKP dırektorynyń quqyqtyq máseleler jónindegi orynbasary Alhaıdar Asqarov.

Kún saıyn statıstıka jáne anyqtalǵan buzýshylyqtar bar reıdterdiń qorytyndylary jınaqtalady.

Esterińizge sala keteıik, monıtorıng toptary zańbuzýshylyqtardy tek bes sanıtarlyq talap boıynsha ǵana tirkeı alady:

- jumys tártibi;

- otbasylyq, eske alý is-sharalaryn (banketter, úılený toılary, mereıtoılar, eske alý) jáne adamdar kóp jınalatyn ózge de is-sharalardy ótkizýge tyıym salý;

- áleýmettik qashyqtyq;

- maska rejımi;

- kelýshiler sanynyń shekten asýy.

Mobıldi toptardyń kásipkerlerge aıyppul salýǵa quqyǵy joq.

Buzýshylyqtar anyqtalǵan jaǵdaıda ákimshilik is qozǵaý úshin materıaldar sanıtarııalyq-epıdemıologııalyq baqylaý qyzmetine beriledi.