Mońǵolııanyń basty aqparat agenttigine 100 jyl

ULANBATYR. QazAqparat – Búgin Mońǵolııanyń basty aqparat agenttigi «MONTsAME»-niń telegraf qyzmeti retinde jumysyn bastaǵanyna 100 jyl toldy, dep habarlaıdy QazAqparat tilshisi.

Búginde eldegi birneshe BAQ-tyń basyn qosyp otyrǵan agenttik 1921 jyldyń 19 shildesinde MONTA – mońǵol telegraf agenttigi retinde qurylǵan bolatyn.

Agenttiktiń 5 tilde habar taratatyn www.montsame.mn saıtynan bólek, aǵylshyn, japon, qytaı jáne orys tilderinde, sondaı-aq, kóne monǵol jazýymen shyǵatyn aptalyq gazetteri bar. Al Mongolia Today jýrnaly toqsan saıyn aǵylshyn tilinde aqparat taratady.

Eldiń 21 aımaǵynda agenttiktiń bólimsheleri jumys isteıdi. Sondaı-aq, Máskeý men Beıjińde de menshikti tilshiler ustaıdy.

Qazaqstandyq oqyrmandarǵa «MONTsAME» agenttigi «QazAqparat» halyqaralyq aqparat agenttiginiń seriktesi retinde tanys. Qazaqstandyq agenttiktiń byltyr ǵana ótken 100 jyldyq toıyna MONTsAME agenttigi de belsene atsalysqan bolatyn.

Tarıhy men mádenıeti jaqyn, irgeles eki eldiń negizgi jańalyqtaryn eki eldiń basty aqparat agenttikteri ózara yntymaqtastyqtyń arqasynda jurtqa ýaqtyly jetkizip keledi.

MONTsAME «QazAqparat» halyqaralyq agenttiginen bólek Azııa-Tynyq muhıty aımaǵynyń OANA aqparat agenttigimen, Reseıdiń TASS, RIA Novostı agenttikterimen, Brıtandyq Reuters agenttigimen, Qytaıdyń Sınhýa agenttigimen, Ońtústik Koreıanyń YONHAP agenttigimen, Túrkııanyń Anadolu agenttigimen únemi aqparat almasyp otyrady.