Mońǵolııalyqtar Qazaqstannyń áleýmettik qamtý tájirıbesine qyzyǵyp otyr

NUR-SULTAN. QazAqparat - Qazaqstanǵa jumys saparymen kelgen Mońǵolııanyń eńbek, áleýmettik qorǵaý mınıstrligi jáne áleýmettik saqtandyrý bas agenttigi ókilderi «Azamattarǵa arnalǵan úkimet» memlekettik korporatsııasynyń front jáne bek-ofısteriniń jumysymen tanysty. Bul týraly korporatsııanyń baspasóz qyzmetine silteme jasap QazAqparat habarlaıdy.

Shara barysynda memlekettik korporatsııanyń áleýmettik tólemder monıtorıngi jáne ádisnama departamentiniń dırektory Serikqan Sabyrjanov mońǵolııalyq áriptesterine zeınetaqy taǵaıyndaý úshin qujattardy qabyldaý jáne ári qaraı sheshim qabyldaý úshin ýákiletti organǵa elektrondy qujattardy jiberý protsesin kórsetti. Sondaı-aq, bala týylýy jáne kútimi boıynsha járdemaqylardy proaktıvti ádispen rásimdeý úderisi de delegatsııa músheleriniń qyzyǵýshylyǵyn týǵyzdy. Aıta ketý kerek, Qazaqstan TMD elderi arasynda birinshi bolyp bala týýyna baılanysty memlekettik qyzmet kórsetýdiń proaktıvti tásilin engizgen bolatyn.

Sonymen qatar, sheteldik qonaqtar egov.kz elektrondyq úkimet portalynyń jumysymen tanysty. Mońǵolııalyqtarǵa telegram-bot messendjeri jáne mGov mobıldi qosymshasy arqyly memlekettik qyzmetterdi alý boıynsha jańa servıster tanystyrylyp, telegram-bot (EgovKzBot) arqyly bir mınýt ishinde zeınetaqy jınaqtary týraly anyqtama alý joldary kórsetildi.

Sheteldik áriptester memlekettik korporatsııanyń jumysyn joǵary baǵalap, áleýmettik sala boıynsha qyzmetterdiń barlyq azamattarǵa birdeı qoljetimdiligine erekshe mán berdi. Olardyń aıtýynsha, Mońǵolııada zeınetaqy tólemderine ótinishti úlken qalalarda Qazaqstandaǵydaı halyqqa qyzmet kórsetý ortalyǵyna uqsas mekemelerde, al aýdan ortalyqtary men eldi mekenderde jergilikti atqarýshy organdarda rásimdeıdi. Zeınetaqy rásimdeýge ótinish berý úshin qujat jınaý da birneshe kezeńnen turady.

Mońǵolııanyń eńbek jáne áleýmettik qorǵaý mınıstrliginiń departament dırektory Basan Batjargal memlekettik qyzmetterdi bir jerden, bir ótinish arqyly alýǵa bolatyn osyndaı ortalyqtardy óz elderinde ashýǵa múddeli ekenin jetkizdi jáne ortalyqtardyń jumysy sátti júrip ketken jaǵdaıda elektrondyq úkimet portalyn qurý týraly josparlaýǵa bolatynyn aıtty.

Aıta keteıik, memlekettik korporatsııa múmkindigi shekteýli azamattardyń sapaly qyzmet alýyna erekshe nazar aýdarady. Búgingi tańda Azamattarǵa arnalǵan úkimettiń barlyq front-ofısteri pandýstarmen, shaqyrý knopkalarymen, Braıl taqtaıshalarymen jáne múgedekterge qyzmet kórsetetin jeńildik terezelerimen jabdyqtalǵan. Front-keńselerdiń ǵımarattary aldynda múmkindigi shekteýli azamattarǵa arnalǵan jeke turaq oryndary da uıymdastyrylǵan.

Sonymen qatar, I jáne II toptaǵy múgedekter 1414 baılanys ortalyǵyna ótinish bere otyryp, memlekettik qyzmetterdi úı jaǵdaıynda ala alady (qońyraý shalý tegin). Al asyraýynda múgedek balalary bar ata-analardyń 1411 nómirine hpbarlasyp, psıhologtyń onlaın-keńesine aldyn ala jazylyp qoıýǵa múmkindigi bar.

Odan bólek 1411 baılanys ortalyǵy arqyly qazaqstandyqtar zeınetaqy men járdemaqy taǵaıyndaýǵa qatysty barlyq máseleler boıynsha tegin keńes ala alady. Jyl basynan beri ortalyq qyzmetkerleri 130 myńnan astam keńes berdi.