Mońǵolııadaǵy eń úlken kıiz úı Gınnestiń rekordtar kitabynda engizildi

ASTANA. QazAqparat - Mońǵolııanyń «Selnen» kompanııasynyń sheberleri jasaǵan alyp kıiz úı Gınnestiń rekordtar kitabynda engizildi, dep habarlaıdy QazAqparat MONTsAME agenttigine silteme jasap.

Kıiz úı eldiń shyǵysyndaǵy Dornogov aımaǵynyń Qatynbulaq aýylyndaǵy Hangı-Mandal baqylaý-ótkizý pýnktiniń mańyna qurylǵan. 36 qanatty kıiz úıdiń jalpy aýdany 1 myń sharshy metrdeı bolady. Alyp orda bir ýaqytta shamamen 500 adamdy syıdyra alady. Kıiz úıdiń bıiktigi 14 metr, bul úshqabatty ǵımarattyń bıiktigimen birdeı. 

Kıiz úıdiń basty ereksheligi - mońǵoldyń dástúrli dızaıny men úıdi ázirleý ádisteriniń saqtalýy. Úlken bolǵanyna qaramastan, kıiz úıdiń tórt baǵanasy bar. Kıiz úı sheteldik týrısterdi tartý maqsatynda paıdalanylatyn bolady. 

Eske sala ketsek, Qyzylorda oblysynyń Qazaly aýdanyndaǵy baǵban júzimmen kómkerilgen kıiz úı jasady. Sonymen qatar, qostanaılyq muǵalim «aqyldy» kıiz úı jasap shyqqan bolatyn.