Mońǵolııada tas jáne qola dáýiriniń jádigerleri tabyldy

ULAN-BATYR. MONTsAME. QazAqparat - Byltyr kóktemde Dornod aımaǵyndaǵy Tsagaan-Ovoo somonynyń turǵyndary ózderi turatyn jerde jádigerlerdiń bar ekendigin málimdegen bolatyn. Osyǵan oraı Dornod aımaǵy ákimshiliginiń qoldaýymen arnaıy zertteý toby qurylǵan edi, dep habarlaıdy QazAqparat MONTsAME agenttigine silteme jasap.

Keshe, 13 qańtarda zertteý toby úlken tarıhı jáne mádenı máni bar tabylǵan olja týraly tolyq aqparatty usyndy.

Zertteý qorytyndysy boıynsha, Tsagaan-Ovoo somonynda 700-den astam jádiger tabylǵan, sonyń ishinde súıekten jasalǵan monshaq, qola pyshaqtar, monetalar, kúıiktas bólshekteri, jebeniń qola aıylbastary, balta, temir pyshaqtar, jebe ushtary, shegeler, metall konteınerlerdiń qaldyqtary jáne temir qoj bar.

Zertteýshiler tabylǵan jádigerlerdiń tas ǵasyr kezeńin, erte temir ǵasyr, qola ǵasyr, Hýnný ımperııasy ǵasyryn jáne orta ǵasyrdy qamtyp otyrǵanyn aıtady. Sondaı-aq, tabylǵan zattar bul jerde buryn óz kásipterimen aınalysqan adamdar mekendegenin jáne olardyń kórshi aımaq turǵyndarymen keńinen baılanys ornatqanyn rastap otyr.