Mońǵolııada prezıdent saılaýynyń ekinshi kezeńi 9 shildede ótedi

ASTANA. QazAqparat - Mońǵolııada prezıdent saılaýyndaǵy daýystar sanalǵan soń, saılaýdyń birinshi kezeńindegi bastapqy málimetke sáıkes Demokratııalyq partııanyń úmitkeri H.Battýlga men Mońǵol Halyq partııasynan M.Enhbold aldyńǵy orynda tur. Olardyń eshqaısysy 50 paıyz daýys jınamaǵandyqtan, saılaýdyń ekinshi kezeńi 9 shilde, jeksenbi kúni ótkiziledi, dep málim etti eldiń Ortalyq saılaý komıtetiniń tóraǵasy Ch.Sodnomtseren.

Mońǵolııa OSK málimetinshe , 1 mln 357 myń 788 saılaýshynyń daýysyn esepteı kele birinshi kezeńde eń kóp daýys jınaǵan H.Battýlga boldy, oǵan 38,64% nemese 511 myń 478 saılaýshy daýys bergen. MHP-ynyń kandıdaty M.Enhbold - 30,75% nemese 411 myń 748 daýyspen ekinshi orynda, al MHRP ókili S.Ganabaatar 30,61% nemese 408 myń 899 saılaýshylardyń qoldaýyna ıe boldy.

Osylaısha, memleket basshysy qyzmetine úmitkerlerdiń eshqaısysy saılaýdyń birinshi kezeńinde 50% (+1 daýys) daýys jınaı almady, sol sebepti OSK prezıdent saılaýynyń ekinshi kezeńin 9 shilde kúni qaıta ótkizýge sheshim qabyldady.  

Aıta keteıik, Mońǵolııa prezıdent saılaýynyń ekinshi kezeńin alǵash ret ótkizgeli otyr. Elde prezıdent tórt jylǵa saılanyp, memleket basqarýdy eki ret atqara alady. Memlekettiń qazirgi prezıdenti Ts.Elbegdorj bılik basynda ekinshi ret otyr.