Mońǵolııada onkologııalyq naýqastarǵa ımmýndyq terapııa qoljetimdi bolmaq

<p>Mońǵolııa densaýlyq saqtaý mınıstrligi, onkologııany ulttyq medıtsınalyq zertteý ortalyǵy (OUMZO) men shveıtsarııalyq &laquo;F.Hoffmann-La Roche&raquo; kompanııasy onkologııalyq aýrýlardy júıeli emdeýdiń eń jańa tehnologııalarynyń biri - qaterli isikke qarsy ımmýndaý terapııasyn bastaý týraly Memorandýmǵa qol qoıdy, dep jazady <a href="https://montsame.mn/ru/read/332927" target="_blank" rel="noopener">montsame.mn</a> agenttigi.</p>

Mońǵolııa onkologııalyq aýrýlarǵa, ásirese baýyrdyń qaterli isigine shaldyqqan nemese sonyń saldarynan qaıtys bolǵan adamdar sany boıynsha Azııada ǵana emes, álemde aldyńǵy qatarda tur. Densaýlyq saqtaý mınıstrliginiń dereginshe, 2022 jyly onkologııalyq aýrýlardan 4548 adam qaza tapty, onyń 2635-i er adam bolsa, 1913–i - áıel.

Úsh jyldan beri Mońǵolııa “RASE nemese barlyq dári naýqasqa bir baǵamen” dep atalatyn shveıtsarııalyq baǵdarlamaǵa qatysyp keledi. Dozasyna qaraı baýyr qaterli isigine shaldyqqan naýqastar 8000-nan 9392 dollar nemese 20-32 mıllıon tógirik (Mońǵolııanyń ulttyq valıýtasy) turatyn bir ınektsııany alady. Biraq osy baǵdarlama aıasynda bul dáriler Mońǵolııaǵa shamamen 1000 dollarǵa jetkiziledi.

Osyǵan baılanysty OUMZO dırektory N.Erdenehýý bylaı dedi: “Immýndaý terapııasy azamattarǵa qarjylaı salmaq salmaıtyndaı tásilmen engizilip jatqanyna qýanyshtymyn. Emdeý baǵasy joǵary bolǵandyqtan medıtsınalyq saqtandyrýdy naryq baǵasymen alý múmkin bolmady. Sol sebepti RASE baǵdarlamasyna qosylý týraly sheshim qabyldandy. Onyń ishinde bir naýqasqa 8 mıllıon tógirik turatyn ımmýndaý terapııasy qoljetimdi bolmaq. Immýndaý terapııasynyń basty ereksheligi - adam aǵzasynyń ımmýndyq júıesi ózi belsendi bolyp, isikti dárilermen emes, adamnyń ımmýndyq jasýshalarymen joıady. Joba úsh jylǵa sozylady. Alǵashqy qyryq naýqas OUMZO qarajaty esebinen em alady. Alǵashqy naýqastarǵa em oń nátıje kórsetip jatsa, emdeý tásili basqalarǵa da qoljetimdi bolady. Azamattarda ımmýndyq terapııany “Densaýlyq qoryndaǵy jańa “Immýndaý terapııasy paketi” aıasynda saqtandyrý arqyly alý múmkindigi bolady".