Mońǵolııada qazaq tilin úırenip alǵan kanadalyq otbasy Qazaqstanǵa qonys aýdarmaq

ULANBATYR. QazAqparat - Qazaqstan Respýblıkasynyń Mońǵolııadaǵy Tótenshe jáne Ókiletti Elshisi Jalǵas Ádilbaev kanadalyq otbasy Kreıg Portell men Sara Portelldi jáne olardyń eki qyzyn qabyldady. Bul týraly QazAqparat Elshiliktiń jelidegi paraqshasyna silteme jasap habarlaıdy.

Kreıg Portell 1998 jyly Mońǵolııanyń Baıan-Ólgıı aımaǵyna alǵashqy ret kelip, jergilikti qandastarymyzǵa aǵylshyn tilinen sabaq bergen. Keıin Portell otbasy osy aımaqqa kóship kelip, 8 jyl ishinde «Nova Lingua» Bilim ortalyǵyn ashyp, jergilikti qazaqtarǵa aǵylshyn tilin, al Baıan-Ólgıı tabıǵatyn qyzyqtaý úshin kelgen shetel týrısterine qazaq tilin úıretýmen aınalysqan. Qazirgi ýaqytta Ulan-Batyr qalasynda muǵalimdik mamandyqtary boıynsha jumys isteıdi.

Kezdesý barysynda Portell otbasy qazaq tilin meńgerý qıyn bolmaǵanyn jáne balalary da azdap qazaqsha túsinetinderin aıtty. Bolashaqta Kreıg pen Sara Qazaqstanǵa qonys aýdarýdy jáne elimizdiń sat-dástúrimen jáne ádet-ǵurpymen tanysýdy josparlaýda.

Óz kezeginde Elshi J.Ádilbaev kele jatqan Naýryz meıramy qarsańyndaǵy Elshilik tarapynan uıymdastyratyn is-sharalarǵa belsene qatysýǵa shaqyra otyryp, ana tilimizdi meńgergen ózge ult ókilderine qoldaý kórsetýge daıyn ekenimizdi jetkizdi.

Kezdesý sońynda, qazaqstandyq dıplomat qonaqtarǵa Qazaqstannan estelik retinde ulttyq naqyshtaǵy syılyqtardy tartý etti.