Mońǵolııada Qazaq kınosynyń kúnderi ótedi

ULANBATYR. QazAqparat - 21 qyrkúıekte Qazaqstan Respýblıkasynyń Mońǵolııadaǵy Elshisi Jalǵas Ádilbaev Mońǵolııa Úkimeti janyndaǵy Mádenıet jáne óner basqarmasynyń bastyǵy Ts.Natsagdolgormen kezdesti, dep habarlaıdy QazAqparat tilshisi.

Kezdesý barysynda Qazaqstan Elshisi Ts.Natsagdolgorǵa Qazaqstan Respýblıkasynyń Prezıdenti Qasym-Jomart Toqaevtyń «Jańa jaǵdaıdaǵy Qazaqstan: is-qımyl kezeńi» Joldaýynyń negizgi aspektileri týraly maǵlumat berdi jáne Joldaýdyń aǵylshyn tilindegi mátinin tabystady.

«Sonymen qatar, Elshi mádenı-gýmanıtarlyq saladaǵy birqatar is-sharalardy, atap aıtqanda Abaı Qunanbaıulynyń 175 jyldyǵy men Ábý Nasyr ál-Farabıdiń 1150 jyldyǵyna arnalǵan keshti uıymdastyrý, sondaı-aq Ulanbatyr, Hovd jáne Ólgıı qalalarynda «Qazaq kınosynyń kúnderin» ótkizý jónindegi josparlar týraly aıtyp ótti.

Taraptar mádenıet salasyndaǵy mamandardy daıarlaý jáne olardyń biliktiligin arttyrý baǵytynda ekijaqty yntymaqtastyqtyń perspektıvalary, sondaı-aq mádenı-gýmanıtarlyq baılanystardy keńeıtý maqsatynda birlesken shyǵarmashylyq qyzmetti júzege asyrý múmkindikteri týraly pikir almasty», - delingen QR Syrtqy ister mınıstrliginiń málimetinde.