Mońǵolııa mektepterinde aǵylshyn tili negizgi shet tiline aınalady

<p>ASTANA. KAZINFORM &mdash; Mońǵolııada aǵylshyn tili negizgi shet tiline aınalady. Al aǵylshyn tili muǵalimderi shetelde bilim alady, dep jazady <a href="https://gazeta-n1.ru/news/society/138024/" target="_blank" rel="noopener">gazeta-n1</a>.</p>

Aǵylshyn tili 2024 jyldyń qyrkúıeginen bastap mońǵol mektepterindegi negizgi shet tili bolady. Bul týraly eldiń jańa bilim mınıstri Pýrevsýrengıın Naranbaıar jańa oqý jylyna daıyndyq jónindegi keńeste málimdedi.

- Úshinshi synyptan bastap aǵylshyn tilin negizgi shet tili retinde oqytý bıylǵy oqý jylynda 100 mektepte testilik rejımde bastalady. Pearson English baǵdarlamasy offlaın jáne onlaın túrde oqytylady, - dedi eldiń bilim mınıstri.

Ol aǵylshyn tili muǵalimderi magıstr dárejesin alý úshin shetelde bilim alatynyn aıtty. Buǵan deıin eki eldiń syrtqy ister mınıstrleri Mońǵolııanyń aǵylshyn tili muǵalimderin Fılıppınde oqytý týraly kelisimge kelgen bolatyn.

Sondaı-aq, AQSh Memlekettik hatshysy Entonı Blınken Ulan-Batorǵa sapary barysynda Mońǵolııada aǵylshyn tili ortalyǵyn qurý nıeti týraly aıtty.