Mońǵolııada 12-17 jas aralyǵyndaǵy balalardyń 75 paıyzǵa jýyǵy vaktsına aldy
Mońǵolııanyń Úkimeti 1 qyrkúıekte jańa oqý jylyn bastaý týraly sheshim qabyldady. Osyǵan baılanysty Ulanbatyrdyń medıtsına qyzmetkerleri mektepter men balabaqshalarda ashylǵan vaktsınalaý men testileý pýnktilerin basqa jerge aýystyrý jóninde shuǵyl jınalys ótkizdi.
Oqytýdy synypta jáne qashyqtan uıymdastyrý úshin eldiń balabaqshalary men mektepterin tazartý jáne dezınfektsııalaý júrgiziledi.
Qazirgi kezde muǵalimder men bilim berý mekemeleri qyzmetkerleriniń 90%-y koronavırýs vaktsınasyn alǵan.
Mońǵolııanyń Bilim jáne ǵylym mınıstriliginiń habarlaýynsha, osy jyly 232 myń bala 1 515 balabaqshada mektepke deıingi bilim alady, sonymen qatar 854 orta bilim berý mektepterinde 718 817 oqýshy bilim alady. 40 165 stýdent 75 orta kásibı bilim berý ortalyǵynda, 150 100 stýdent 88 joǵary oqý ornynda oqıdy.
2 tamyzdaǵy jaǵdaı boıynsha, 12-den 17 jasqa deıingi balardyń 74,8%-y vaktsına alǵan.