Mońǵolııa kompozıtory búrkitshi qyz Aısholpanǵa týyndy arnady
Jıynǵa Qazaqstannyń túkpir-túkpirinen jáne alys-jaqyn shet elderden arnaıy shaqyrylǵan dırıjerler qatysty. Olardyń biri – kóptegen halyqaralyq baıqaýlardyń laýreaty, álemdik deńgeıdegi mýzykant, solıst, kompozıtor, «Kúmis aǵash» ıegeri Chınbat Orhonbaatar Ertis óńirinde ótetin festıvalde búrkitshi qyz Aısholpanǵa arnaǵan týyndysynyń tusaýyn kesýdi josparlap otyrǵany týraly jańalyqpen bólisti.
«Qazaqstanǵa, Pavlodar óńirine alǵash ret kelgenime óte qýanyshtymyn. 2012 jyly Pavlodar qalasynyń orkestri Talǵat Kárimovpen birge Seýlde oqyǵan kezde tanysqan edik. Búgingi kezdesý sol dostyqtyń jalǵasy dese bolady. Erteń sıyrdyń múıizinen jasalǵan mońǵol halqynyń úrmeli aspaby - ever-býree jáne qazaq halyq aspaptary orkestrimen óner kórsetemin», - deıdi Chınbat Orhonbaatar.
Sondaı-aq, klassıkaǵa aınalǵan Montıdyń Chardash degen shyǵarmasyn oınaımyn. Bul festıvalge arnaıy aty álemge tanylǵan búrkitshi qyz Aısholpanǵa arnaǵan «Búrkitshi qyz» degen shyǵarmamdy jazǵan edim jáne sol tól týyndymdy kórermen qaýymǵa usynamyn.
Kompozıtor Rústembek Omarovtyń shyǵarmashylyǵymen jaqsy tanys ekenin jáne halyq aspaptar orkestriniń qurylýy týraly biraz zerttegenin aıtady. Óner ıesi Japonııa, Koreıa, Germanııa elderine shaqyrtý alǵan jáne Mendelson kontsertiniń qatarynan úsh bóliminde tarıhta alǵash ever-býree - mońǵol ultyq aspabynda oınaǵan. Altaı Respýblıkasy memlekettik orkestriniń kórkemdik jetekshisimen birge kelgen 26 jastaǵy mýzykant Dobrynıa Satın festıvalde altaı taqyryptarynda popýrı jáne saltanatty «Altaı» sıýıtasyn oryndaıtynyn aıtady. Avtory - Vladımır Konchev.
«Rústembek Omarov orkestri bizdi óte jaqsy qarsy aldy jáne olardyń Altaı halqynyń mádenıetimen tanysýǵa degen qyzyǵýshylyǵy zor. Álbette, biz kóne altaı ánimen, ıkılı, amyrgy, topshýr, komys ulttyq aspaptarda oınaýdyń qupııasymen bólisemiz. Barynsha ulttyq etnıkalyq aspaptardy, mádenıetimizdi, batyrlar epostarynan úzindi kórsetkimiz keledi»,- deıdi Dobrynıa Satın.
Budan basqa, festıvalde Reseı men Qyrǵyzstannyń, Mońǵolııa men Qazaqstannyń eńbek sińirgen qaıratkerleri, mádenıet salasynyń úzdikteri Halyqaralyq konkýrstardyń laýreattary Vladımır Konchev, Baqyt Tilegenov, Janas Bekenturov, Álı Alpysbaev, Dáýren Glymov, Nazymbek Moldahmetov, Talǵat Kárimov, Erkin Nurymbetov, Nurlan Tókeıuly, Ásem Sembına óner kórsetedi. Eske sala keteıik, Mońǵolııada qusbegilikpen aınalysatyn qazaq qyzy Aısholpan Nurǵaıyp jaıly túsirilgen derekti fılm «Oskar» kınosyılyǵynyń short-paraqshasyna engen.
Ol osydan birneshe jyl buryn búrkitshiler arasynda uıymdastyrylǵan úlken jarysqa qatysqan soń tanymal bola bastaǵan.