Mońǵolııa kólik logıstıkasyn damytýda Qazaqstanǵa nazar aýdarýy tıis - Demberel

ASTANA. QazAqparat - 2017 jylǵy qańtardaǵy QR Prezıdenti Nursultan Nazarbaevtyń «Qazaqstannyń úshinshi jańǵyrýy: jahandyq básekege qabilettilik» damý tujyrymdamasy Qazaqstannyń álemdegi kóshbasshy 30 eldiń qataryna enýiniń naqty qadamdary kórsetilgen joldaý ekendigi aıqyndaldy. 

Bul pikirin Ph.D doktory, Mońǵolııa Ǵylym akademııasynyń Halyqaralyq qatynastar ınstıtýtynyń aǵa mamany, Ortalyq Azııa elderi boıynsha zertteý ortalyǵynyń úılestirýshisi K.Demberel bildirdi.

«Joldaýdaǵy bes baǵyt Qazaqstan memleketiniń jaqyn bolashaqtaǵy damýynyń basty bes nysanasy ekendigin atap ótkim keledi.

Qujattaǵy negizgi erekshelikterdiń birine toqtala ketsem,  «Eýrazııa logıstıka ınfraqurylymy» damý máselesine durys nazar aýdarylǵan dep esepteımin. Bul Mońǵolııa úshin nazar aýdaratyn basty máselelerdiń biri. Ókinishke oraı, Mońǵolııa arqyly áýe, avto, temirjol tranzıtin damytý logıstıkasy týraly aıtqaly kóp ýaqyt ótse de, biz ony júzege asyra almaı kelemiz.

Sondaı-aq, energetıka, transport, logıstıka, turǵyn úı qyzmetindegi baǵa tarıfin belgili mólsherde tómendetý baǵytyndaǵy keshendi sharalarǵa durys nazar aýdarylǵan. Memleket-jekemenshik sektorynyń seriktestigin keńeıtý, JІÓ-degi memleket úlesin 15 paıyzǵa deıin tómendetý jáne bilim júıesin jetildirý, sonyń ishinde jappaı tegin tehnıkalyq bilim berý máseleleri Mońǵolııa men Ortalyq Azııanyń basqa da memleketterine ózekti bolyp otyr.

QR Prezıdenti N.Nazarbaevtyń memlekettiń basqarý tetigin jetildirý, halyqtyń ál-aýqatyn arttyrý jolynyń kózi retinde jańasha reformalar júrgizýin kóregendik dep bilemin. Jaqynda ǵana Qazaqstanda júzege asyrylǵan Konstıtýtsııaǵa ózgerister engizý qadamdary memleket basshylyǵy zaman talabyna saı áreketterge baryp jatqanyn kórsetip otyr. Bul mindetti túrde Qazaqstannyń damýynda úlken ról atqaratyndyǵyna kúmán joq.

Jalpy alǵanda, eksporttyń basym bóligin quraıtyn munaı, gaz, mys, altyn sekildi basty shıkizat kózderine álemdik naryqtaǵy baǵanyń tómendeýi jaǵdaıynda Qazaqstan ekonomıkasynyń ózindik qory, áleýeti bar ekendigin kórsetip otyr. Qazirgi álemdik damý jaǵdaıynda ekonomıkanyń 1 paıyzdyq ósimi jaqsy kórsetkish dep sanalatyndyǵy  da sonyń da bir dáleli.

Osy oraıda, qazirgi qıyn kezeńde «Ýnıversıada-2017», «EKSPO-2017» sekildi halyqaralyq is-sharalardy uıymdastyryp jatqandyǵy Qazaqstannyń múmkinshiligi zor ekendigin kórsetýde. Bul jobalardy júzege asyrý barysynda Qazaqstan ózin álemge tanytý sıpatynan ǵana emes, kerisinshe osy is-sharalar nátıjesinde ınvestıtsııa tarta otyryp, dúnıejúzi qaýymdastyǵynyń senimine ıe bolyp otyr», - dep bildirdi óz oıyn K.Demberel.