Mońǵolııa qazaqtary malǵa shapqan qar barysyna tıispeı, túzge qoıa bergen

ASTANA. QazAqparat - Mońǵolııanyń Baıan-Ólgeı aýdanynda malǵa shapqan qar barysyn mamandar tekserip, qaıtadan túzge qoıa berdi. Bul týraly feısbýk paraqshasynda QR AShM Orman sharýashylyǵy jáne janýarlar álemi komıtetiniń baspasóz hatshysy Sáken Dildahmet jazdy, dep habarlaıdy QazAqparat tilshisi.

Eske sala ketsek, buǵan deıin Sáken Dildahmet áleýmettik jelide belgisiz bireýlerdiń qar barysyn ustap alǵany týraly vıdeo tarap ketkenin, qazirgi ýaqytta materıal zerttelip jatqanyn jazǵan edi. Feısbýkte taraǵan vıdeoda qazaq tilinde sóılegen bir top adamnyń qar barysyn ustap alǵany kórinip tur. Osyǵan baılanysty oqıǵa Qazaqstanda bolǵan degen boljam paıda bolǵan edi.

Búgin Sáken Dildahmet jelide taraǵan atalmysh vıdeonyń mán-jaıy anyqtalǵanyn jarııa etti.

«Mońǵolııalyq Saıan TV telearnasy atalǵan jaǵdaı boıynsha arnaıy reportaj jasapty. 2019 jyldyń aqpan aıynyń sońynda qazaqtar turatyn Mońǵolııanyń Baıan-Ólgeı aýdanynda qar barysy malǵa shaýyp, aqyry ustalyp qalǵan. Alaıda túz taǵysyn eshkim óltirmeı, saraıǵa qamap, tabıǵat qorǵaýshylarǵa habar bergen. Mamandar qar barysynyń jaǵdaıyn baǵamdap, túzge qaıta qoıa beripti. Mońǵolııadaǵy qazaq baýyrlarymyzǵa bul erligi úshin myń da bir alǵys. Bizdiń azamattar úshin bul úlgi. Mońǵolııada jergilikti turǵyndar qar barysyna óte qamqor», - dep jazady Sáken Dildahmet.