Mońǵolııa astanasynan Ulytaýǵa deıingi ekspedıtsııa jolǵa shyqty

ASTANA. QazAqparat - Búgin Túrki akademııasy halyqaralyq uıymy (TWESCO) uıymdastyrǵan «Kentaıdan Ulytaýǵa deıin: tarıhı jadynyń jańǵyrýy» atty ІІІ halyqaralyq ekspedıtsııa óz jumysyn bastady, dep habarlaıdy QazAqparat TWESCO-ǵa silteme jasap .

Akademııa basshysy Darhan Qydyráli bastaǵan bir top zertteýshi men jýrnalıster Mońǵolııa astanasy Ulan-Batyr qalasyna attandy.
 

Atalǵan halyqaralyq ekspedıtsııanyń basty maqsaty - QR Prezıdenti Nursultan Nazarbaevtyń «Bolashaqqa baǵdar: rýhanı jańǵyrý» atty maqalasynda  aıryqsha nazar aýdarylǵan - kıeli jerler men tarıhı sanany jańǵyrtý. Ekspedıtsııa marshrýty Mońǵolııanyń Kentaı aımaǵyndaǵy Shyńǵys hannyń týǵan jeri Býrhan Haldýnnan bastalyp, Ulytaýdaǵy Alasha han, Joshy han kesenesine deıin jalǵasatyn bolady.

Ekspedıtsııa músheleri Kentaı aımaǵyna attanbas buryn Mońǵolııa astanasynda birqatar kezdesýler ótkizedi dep josparlanǵan.

Aıta keterligi, bul ekspedıtsııa TWESCO men Mońǵolııa Ulttyq mýzeıi arasynda 2016 jyldyń tamyz aıynda bekitilgen yntymaqtastyq memorandýmy sheńberinde uıymdastyrylyp otyr. Ol qujat Shyǵys Mońǵolııadaǵy Kentaı aımaǵynan tabylǵan kóne túrki keshenderine arheologııalyq ekspedıtsııa jasaqtap, birlesken qazba jumystaryn júrgizýge múmkindik beredi.