Mońǵolııa 1 mamyrdan bastap shekarasyn ashady

ULANBATYR. MONTsAME-QazAqparat - Búgin Mońǵolııanyń mınıstrler kabıneti 1 mamyrdan bastap shekarany ashý týraly sheshim qabyldady. Bul týraly vıtse-premer, Memlekettik tótenshe komıssııa basshysy S.Amarsaıhan málimdedi, dep habarlaıdy QazAqparat MONTsAME agenttigine silteme jasap.

S.Amarsaıhannyń aıtýynsha, premer L.Oıýýn-Erdene ótken aptada týrıstik sala ókilderimen kezdesip, sala qyzmetin qalypty rejımde jalǵastyrý úshin qajetti sharalardy qabyldaýǵa nıetti ekenin bildirgen. Sondaı-aq ol «Halyqqa aýqymdy vaktsına egý protsesi tıimdi júrgizilse jáne memlekettik organdar men jeke sektorlar tıisti sanıtarııa-epıdemıologııalyq sharalardy qatań saqtasa, Úkimet 1 mamyrdan bastap shekarany ashý úshin belsendi jumys júrgizedi», dep atap ótti.

Osyǵan baılanysty baqylaý-ótkizý pýnktteriniń (BÓP) ázirligin qamtamasyz etý jónindegi MTK jumys toby BÓP-tegi sanıtarııa-gıgıenalyq jaǵdaıdy jaqsartý úshin Altanbýlag jáne Zamyn-Úúd sumyndarynda, sondaı-aq batys jáne shyǵys shekara mańyndaǵy aýdandarda jumys istedi.