Mońǵoldyń maly jaıylymdarǵa syımaı jatyr

ASTANA. QazAqparat - Búginde Mońǵolııa halqynyń sany 3,2 mln adamdy quraıdy. Al jalǵyz jylqy malynyń ózi 4 mln-ǵa jaqyndady. Bul barlyq mal sanynyń tek 5,9 protsenti ǵana, dep habarlaıdy QazAqparat tilshisi.

Resmı málimetke sáıkes, Mońǵolııada qoıdyń sany 30 mln-nan asady. Eshki basy 27,3 mln bolsa, sıyr men qodas 4,4 mln basqa teń. Mońǵol halqynyń úshten biri aýyl sharýashylyǵy salasynda eńbek etedi.

Qazaqstannyń Mońǵolııadaǵy Tótenshe jáne Ókiletti elshisi Qalybek Qoblandınniń aıtýynsha, búginde mal basynyń kóptigine baılanysty jaıylym jerleriniń tapshylyǵy týyndap otyr. Halyq bos jaıylymdardy tappaı júr. «Qazirgi kezde mal basynyń jalpy sany 66,2 mln-dy quraıdy. Bıyl kóktemde atalǵan kórsetkish 70 mln-nan asady degen boljam bar. Sondyqtan osy elde týyndaǵan basty másele - et ónimderin eksportqa shyǵarý. Biraq maldy asyldandyrý jáne sanıtarlyq-epıdemıologııalaq salada biraz sharýany atqarý qajet. Sońǵy kezderi terrıtorııanyń úlken bolǵanyna qaramastan, Mońǵolııada jaıylym jerleriniń tapshylyǵy týyndaı bastady», - dedi Q.Qoblandın Astanada ótken baspasóz máslıhatynda.
 

Aıta keteıik, Mońǵolııanyń terrıtorııasy 1 566 000 km² quraıdy. Al Qazaqstan odan eki esege úlken - 2 725 000 km². Statıstıka komıtetiniń málimetine sáıkes, 2018 jyldyń 1 naýryzda elimizde jylqynyń sany 2,3 mln bas boldy. Іri qara mal 7,1 mln-dy qurasa, qoıdyń sany 19 mln-nan asty.