Mońǵol men qazaqtyń ortaq dúnıeleri kóp - Mońǵolııa elshisi

NUR-SULTAN. QazAqparat - Elordada ótip jatqan kóshpendiler etnofestıvali barysynda Mońǵolııanyń Qazaqstandaǵy Tótenshe jáne Ókiletti Elshilisi Lývsan Battýlga qazaq jáne mońǵol halqy úshin kóshpendiliktiń ortaq dúnıe ekenin aıtyp ótti, dep habarlaıdy QazAqparat tilshisi.

«Festıvalge Mońǵolııa ókilderi alǵash ret qatysyp otyr. Bizdiń qatysýshylar at ústi óneri men sadaq atýdan kórsetilim usynatyn bolady. Jalpy alǵanda mońǵol men qazaq elderiniń ortaq dúnıeleri kóp. Onymen birge, kóshpendilik qazaq pen mońǵol halqynyń qanynda bar qasıet. Sondyqtan bul ortaq mereke dep bilemin», - dedi Lývsan Battýlga.

Onyń aıtýynsha, Mońǵolııadan 17 qatysýshy keldi jáne olar eki kún boıy óz ónerlerin kórsetedi.

«Bizde kóshpendiler festıvali jyl saıyn ótetin ulttyq mereke bolyp sanalady. Ásirese, bizde at ústinde shabý, dala kúresi (erkin kúres) jáne sadaq atý búginge deıin saqtalǵan. Ózińiz biletindeı mońǵol halqy áli kúnge deıin kóshpendilikpen aınalysady. Bizde 3 mln halyq bolsa, onyń jartysyna jýyǵy kóshpendilik dástúrin saqtap keledi. Qazaqstannyń ata-baba dástúrin osyndaı zamanaýı ári halyqaralyq deńgeıde dáripteýi quptarlyq is. Sebebi ulttyq qundylyqty umytpaý kerek. Jáne Mońǵolııa ókilderi endigi ýaqytta festıvalge turaqty túrde qatysady dep senemin», - dedi ol.

Sondaı-aq, mońǵol elshisi atalǵan sharanyń etnotýrızmdi damytýǵa oń áserin tıgizetinin tilge tıek etti.

Buǵan deıin habarlaǵanymyzdaı elordada «Kóshpendiler Álemi» halyqaralyq etnofestıvali ótip jatyr. Oǵan 11 elden 200-ge jýyq ókil qatysýda.