Moldovadaǵy referendým: eýropalyq ıntegratsııa jaqtaýshylary jeńiske jetti

<p>ASTANA.KAZINFORM - Jeksenbi kúni ótken referendýmda Moldova azamattary eýroıntegratsııany jaqtady, resmı derekterge sáıkes, olar az ǵana basymdyqpen jeńiske jetti, dep jazady <a href="https://ru.euronews.com/my-europe/2024/10/21/moldova-sandu-criminal-bribery" target="_blank" rel="noopener">Euronews.</a></p>

Moldova prezıdenti jeksenbi kúngi referendýmda bıýlletenderdiń 58 paıyzy óńdelgen soń eldiń EO-ǵa kirýine qarsy daýystardyń basym bolýynyń sebebi saılaýshylardyń kóbi satyp alynǵan dep túsindirdi. Odan keıin hattamalardyń 98,11 paıyzy sanalyp, eýropalyq ıntegratsııany qoldaıtyndar men qarsylar teń túskeni jarııalandy. Al bıýlletenderdiń 100 paıyzy óńdelgende eýropalyq ıntegratsııany jaqtaýshylardyń jeńiske jetkeni belgili boldy.

Moldova prezıdenti Maııa Sandý jeksenbi kúngi referendýmda saılaýshylardy satyp alý bolǵanyn málimdep, «bostandyq pen demokratııaǵa buryn-sońdy bolmaǵan shabýyl» jasalǵanyn aıtty. Memleket basshysynyń aıtýynsha, «qylmystyq toptar» 300 myń daýysty - barlyq tirkelgen saılaýshylardyń 10%-yn satyp alǵan.

«Keıbireýler óz daýystaryn satyp jiberdi. Kez kelgen demokratııalyq elde adamdardyń kózqarasy ártúrli, bul qalypty jaǵdaı. Biraq qylmystyq toptardyń saılaýshylardy satyp alýy qalypty jaǵdaı emes. Men qylmystyq toptardy Moldova saılaýshylarynyń daýysyn satyp alý úshin aram aqsha paıdalandy dep aıyptaımyn», - dedi Maııa Sandý.

Maııa Sandý bul qylmystyq toptardyń naqty kim ekenin atamady. Moldova oppozıtsııasy Maııa Sandý óziniń málimdemelerine dálel keltirmegenin aıtty. Al EQYU-nyń halyqaralyq baqylaýshylary óz kezeginde ýchaskelerde daýys urlaý faktilerin tirkemegenin, biraq «manıpýlıatsııalyq aralasý», jalǵan aqparat naýqandary jáne saıası kúshterdi zańsyz qarjylandyrý týraly ártúrli faktiler bolǵanyn atap ótti.

Buǵan deıin Moldovadaǵy referendýmda EO-ǵa qosylýdy jaqtaýshylar men qarsylardyń daýsy teń túskenin habarlaǵan bolatynbyz.