Moldovada prezıdentti saılaý men EO-ǵa qatysty referendým ótip jatyr

<p>ASTANA. KAZINFORM &ndash; Moldovanyń prezıdentin saılaý men osy eldiń Eýropa odaǵyna qosylýyna qatysty referendýmda daýys berýge arnalǵan saılaý ýchaskeleri ashyldy, dep jazady <a href="https://ria.ru/20241020/moldaviya-1978946092.html" target="_blank" rel="noopener">RIA Novostı</a>.</p>

Jergilikti zańnamaǵa sáıkes, eger saılaýshylardyń qatysý deńgeıi 33,3 paıyzdan assa, prezıdentti saılaý ótti dep tanylady. Referendým ótkizý úshin de osyndaı kórsetkishter qajet.

Tańerteń Moldova aýmaǵynda 2,2 myńnan astam saılaý ýchaskesi, sondaı-aq shetelde 234-i jumysyn bastady.

Zańǵa sáıkes eger birinshi týrda úmitkerlerdiń eshqaısysy saılaýshylardyń jartysynan kóbiniń qoldaýyna ıe bola almasa, onda eki aptadan keıin eń kóp daýys jınaǵan eki kandıdat arasynda ekinshi týr ótýi tıis. Bul rette saılaýdyń ekinshi kezeńi 3 qarashada ótýi múmkin.

Memleket basshysy laýazymyna 11 kandıdat tartysqa túsip jatyr, olardyń arasynda qazirgi prezıdent Maııa Sandý da bar.

Sonymen qatar, referendým aıasynda respýblıka turǵyndary «Siz Moldova Respýblıkasynyń Eýropa odaǵyna kirýi úshin konstıtýtsııany ózgertýdi qoldaısyz ba?» degen suraqqa jaýap berýi kerek.

Eske salsaq, 2022 jyly Ýkraına men Moldova Eýropa odaǵyna múshelikke úmitker elder mártebesin aldy.