Moldova Prezıdenti Igor Dodon: Qazaqstan ekonomıkanyń túrli baǵyttarynda zor tabysqa qol jetkize aldy

ASTANA. QazAqparat - Memleket basshysynyń atyna ulttyq merekemiz - Qazaqstan Respýblıkasynyń Táýelsizdik kúnine oraı hattar men jedelhattar kelip tústi, dep habarlaıdy Aqordanyń baspasóz qyzmeti.

Moldova Respýblıkasynyń Prezıdenti Igor Dodon joldaǵan hatynda: «Moldova halqynyń jáne jeke ózimniń atymnan ulttyq merekelerińiz - Táýelsizdik kúnimen shyn júrekten quttyqtaımyn. Osy jyldar ishinde tabıǵı resýrstary men adamı áleýeti mol Qazaqstan ulttyq ekonomıka men áleýmettik salanyń túrli baǵyttarynda zor tabysqa qol jetkize aldy. Bul qazaqstandyqtardyń ál-aýqatyn arttyryp qana qoımaı, elderińizdiń ımıdjin halyqaralyq deńgeıde ilgeriletýge septigin tıgizedi», - dep atap ótken.

Sonymen qatar, ózderiniń jedelhattarynda Iordanııa Koroli ІІ Abdalla, Shvetsııa Koroli Karl Gýstav, Oman Sultany Kabýs ben Saıd, Vetnam Sotsıalıstik Respýblıkasynyń Prezıdenti Ngýen Fý Chong, Malaızııa Joǵarǵy bıleýshisiniń orynbasary Sultan Nazrın Mýızzýddın Shah Qazaqstan halqyna beıbit ómir jáne baq-bereke tileıdi.