Móldir Áýelbekova sport estafetasyn Baýyrjan Baıbekke joldady
QR Mádenıet jáne sport mınıstrliginiń baspasóz qyzmetinen habarlaǵandaı, Qazaqstandaǵy buqaralyq sportty dáripteý úshin otandyq juldyzdar jattyǵý alańdarynda óz kúshterin kórsetip, halyqty sportpen shuǵyldanýǵa shaqyrǵan.
Olar týrnıkte tartylyp boı túzep, kóshe alańdarynda ornalasqan túrli jattyǵý qurylǵylarynda mashyqtaryn kórsetti.
«Men balamdy bosanǵan soń, fıtnespen belsendi túrde jattyǵa bastadym. Sebebi ózimdi aýyr sezindim, artyq salmaqty baıqadym. Jastar, kóshedegi sport alańdaryna baryńyzdar! Qazirgi tańda kez kelgen turǵyn úı kesheniniń aldynda ornalasqan týrnıkter men túrli jattyǵý alańdary deneni ádemi qalypqa keltirip, ózimizdi sergek sezinýge kómektesedi », - deıdi Móldir Áýelbekova.
Qazaqstandyq estrada ánshileri buqaralyq sportty nasıhattap, atalmysh jobany Almaty qalasynyń ákimi Baýyrjan Baıbekke joldady.
«Biz joldamany Almaty qalasynyń ákimi Baýyrjan Baıbekke, «Qazaq radıolary» JShS-niń dırektory Mádı Manatbekke jáne sahnada birge júrgen áriptesterimiz Talǵat Jorabaev pen Ermek Muqashevke joldaımyz», - dedi Móldir Áýelbekova men Raıym Ýaıys.
Eske sala ketsek, «Street Workout KZ» aktsııasyn QR Mádenıet jáne sport mınıstri Arystanbek Muhamedıuly bastap bergen bolatyn. Arystanbek Muhamedıuly jobany ózi bastap, «Street Workout KZ» baıqaýyn - Olımpıada chempıony Serik Sápıevke, tanymal ánshi Qaırat Nurtasqa, tanymal qazaqstandyq akter Ádil Ahmetovqa joldaǵan edi.
Al budan keıin boksshy Baqtııar Artaev pen taekvondoshy Arman Chılmanov QR Mádenıet jáne sport mınıstri Arystanbek Muhamedıulynyń Street workout KZ boıynsha bastamasyna qosyldy.
Aktsııany keıin Atyraý oblystyq dene shynyqtyrý jáne sport basqarmasynyń basshysy Azamat Beket Beıjiń Olımpıada oıyndarynyń taekvandodan qola júldegeri Arman Chılmanovtan estafetany qabyldap, Sochı Olımpıada oıyndarynyń qola júldegeri mánerlep syrǵanaýshy Denıs Ten jáne bokstan álem chempıony Galıb Djafarovpen birge beıne-úndeý túsirgen. Rolıkte sportshylar barlyq qazaqstandyqtardy street workout-pen aınalysýǵa shaqyrdy.
Aıta keterligi, buǵan deıin atalǵan aktsııaǵa Qanat Islam da atsalysqan. Sportshylarmen birge estrada juldyzdary da, sheteldegi qazaq stýdentteri de belsendi túrde qatysýda.