Mol jaýǵan qar túrkistandyq 167 sharýanyń jylyjaıyn jaramsyz kúıge túsirdi

TÚRKІSTAN. QazAqparat - Túrkistan oblysynda 167 sharýaǵa tıeseli 36 gektar jylyjaıdyń konstrýktsııasy qar salmaǵyn kótere almaı, jaramsyz kúıge tústi, dep habarlaıdy QazAqparat tilshisi.

Túrkistan oblysynda kómir tapshylyǵynan birshama jylyjaıda ónimder búlinip ketken bolatyn. Máselen, Saıram aýdanyndaǵy «Nur-Agro» JShS-niń jylyjaıynda jylytý qazandyǵy qatty sýyqqa shydas bermegen. Saldarynan 3,6 gektar jylyjaıdyń 1,8 gektaryndaǵy 42 myń qyzanaq kósheti úsip ketken. Jylytý júıesiniń 70 paıyzy, tamshylatý júıesiniń 70 paıyzy, tumandatý júıesiniń 40 paıyzy isten shyqty.

Al «Barakat» sharýa qojalyǵynda jaryq jelisiniń úzilýi saldarynan 2,4 gektar jylyjaıda qyzanaqtyń 60 myń kóshetin úsik shalǵan.

Óńirde aýa raıynyń tosyn minezinen osy syndy jaǵdaılarǵa ushyraǵan sharýalar kóp.

Málim bolǵandaı, Túrkistan oblysynyń ákimi Darhan Satybaldynyń tapsyrmasymen jylyjaılarǵa kómek kórsetý máselesi jan-jaqty qarastyrylýda.

Búgin oblys ákiminiń orynbasary Ermek Kenjehanuly fermerlermen kezdesti. Basqosýǵa jaýapty basqarma basshylary men qarjy uıymdarynyń jetekshileri qatysty. Sonymen birge onlaın qosylǵan temirjol tasymaldaýshylary kóterilgen suraqtarǵa jaýap berdi.

Oblys ákimdiginiń baspasóz qyzmetiniń málimetinshe, iri jylyjaı keshenderi mundaı jaǵdaıǵa daıyn bolǵandyqtan shyǵynǵa ushyramaǵan. Onyń ústine bıznesi saqtandyrylǵandyqtan, shyǵyndy zań júzinde óteý jaǵy qarastyrylǵan.

Zardap shekken – shaǵyn jylyjaılar. Olardy qarjy uıymdary arqyly jeńildetilgen nesıemen qamtý jumysy atqarylýda. Alaıda jylyjaılardyń 90% astamynyń qujattary joq nemese túgel emes bolyp shyqqan. ıAǵnı, zań aıasynda qarjylaı qoldaý jaǵy qıynǵa túsedi.

Sondaı-aq qatty jaýǵan qardan qulaǵan jylyjaılardyń basym bóliginde egin egý jumystary bastalmaǵan. Jalpy, shaǵyn jylyjaılar jeńil konstrýktsııadan, qoldan jasalǵan. Búginde 167 taýar óndirýshiniń 36 gektar jylyjaıy qar salmaǵyn kótere almaı, jaramsyz kúıge túsken.

«Oblys ákimdigi tarapynan jylyjaı ıelerine qoldaý kórsetý joldary jan-jaqty zerdelenip jatyr. Barlyq taraptyń usynysy saralanǵannan keıin zań aıasynda kómek kórsetiledi», - delingen oblys ákimdiginiń baspasóz qyzmeti taratqan aqparatta.

Aıta keteıik, kómir tapshylyǵynan Túrkistan oblysynda jylyjaıdaǵy ónimder úsip jatqanyn budan buryn jazǵan bolatynbyz. Ol kezde óńir ákimdigi taýar óndirýshilerdiń múlkine keltirilgen nuqsan jóninde akt usynylǵan jaǵdaıda, qarjy uıymdary aldyndaǵy bereshekti (nesıe) óteý merzimin 1 jylǵa shegerý jóninde usynys joldanatyny týraly aıtqan edi.

Foto: otyrar.kz